ಆರು ವರ್ಷದ ಹಿಂದೆ ಜಿ.ಎಸ್. ಪರಮಶಿವಯ್ಯ ಹೇಳಿದ್ದ ಮಾತು ಸತ್ಯವಾಯಿತಾ?
ಬೆಂಗಳೂರು: ಬಯಲು ಸೀಮೆಯಷ್ಟೇ ಅಲ್ಲ, ನಾಡಿನ ಪ್ರತಿಯೊಬ್ಬರೂ ಆಘಾತಗೊಳ್ಳುವ ಘಟನೆಯೊಂದು ನಡೆದುಹೋಗಿದೆ. ಅನೇಕ ನೀರಾವರಿಯ ಕನಸುಗಳು, ಆಸೆಗಳು ಮತ್ತು ಆಕಾಂಕ್ಷೆಗಳು, ಜತೆಗೆ ಅಮೂಲ್ಯವಾದ ವರದಿಗಳು ಏಕಕಾಲಕ್ಕೆ ಬೆಂಕಿಗೆ ಆಹುತಿಯಾಗಿವೆ. ದ್ವಾಪರಯುಗದಲ್ಲಿ ಅಗ್ನಿಯು ಅಮೂಲ್ಯವಾದ ಗಿಡಮೂಲಿಕೆಗಳ ತವರಾಗಿದ್ದ ಖಾಂಡವ ವನವನ್ನು ದಹಿಸಿದಂತೆ ಇಲ್ಲಿ ಕರುಣೆ ಇಲ್ಲದ ಬೆಂಕಿ ನಮ್ಮ ರಾಜ್ಯದ ಮುಂದಿನ ತಲೆಮಾರುಗಳಿಗೆ ಅಮೂಲ್ಯ ದಾಖಲೆಗಳಾಗಿದ್ದ ಕಾಗದ ಪತ್ರಗಳನ್ನು ನುಂಗಿಹಾಕಿದೆ.
ಏನಾಯಿತು?
ಜಿ.ಎಸ್. ಪರಮಶಿವಯ್ಯ ಅವರು ಬಯಲು ಸೀಮೆ ಪಾಲಿನ ಭಗೀರಥರು. ಬದುಕಿದ್ದಷ್ಟು ಕಾಲವೂ ಬರಪೀಡಿತ ಜಿಲ್ಲೆಗಳಿಗೆ ಶಾಶ್ವತವಾದ ನೀರಿನ ಆಸರೆ ಮಾಡಬೇಕೆಂದು ತಪಿಸಿದ ಜೀವ. ತಮ್ಮ ಜೀವಿತಾವಧಿಯ ಕೊನೆ ಕ್ಷಣದವರಗೂ ಈ ಉದ್ದೇಶಕ್ಕಾಗಿ ಬಾಳಿದ ವಿರಳ ವ್ಯಕ್ತಿ. ಅವರು ತಮ್ಮ ಮನೆಯಲ್ಲಿ ಭದ್ರವಾಗಿ ಕಾಪಿಟ್ಟುಕೊಂಡಿದ್ದ ವಿವಿಧ ಯೋಜನೆಗಳ ವರದಿಗಳು, ಯೋಜನಾ ವರದಿಗಳೆಲ್ಲ ಸುಟ್ಟು ಭಸ್ಮವಾಗಿವೆ. ಈ ಸರಕಾರಗಳಿಗೆ ಕಣ್ಣಿಲ್ಲ, ಇದ್ದರೂ ಕಾಣಲ್ಲ, ಆಳುವ ಮಂದಿಗೆ ಜನರ ನೋವು ಕೇಳುವ ಮನಸ್ಸಿಲ್ಲ.. ಹೀಗಾಗಿ ಈ ದಾಖಲೆಗಳನ್ನು ಇಟ್ಟುಕೊಂಡು ಮಾಡುವುದೇನು? ಎಲ್ಲವನ್ನೂ ತೆಗೆದುಕೊಂಡು ಹೋಗಿ ವಿಧಾನಸೌಧದ ಮುಂದೆ ಹಾಕಿ ಸುಟ್ಟುಬಿಡುತ್ತೇನೆ ಎಂದಿದ್ದರು ಪರಮಶಿವಯ್ಯನವರು. ಈಗ ಅದೇ ಆಗಿದೆ. ಅವರು ಸಂರಕ್ಷಿಸಿದ್ದ ದಾಖಲೆಗಳೆಲ್ಲ ಬೆಂಕಿಗೇ ಆಹುತಿಯಾಗಿವೆ.
ನೀರಾವರಿ ತಜ್ಞ ಜಿ.ಎಸ್. ಪರಮಶಿವಯ್ಯ ತಮ್ಮ ಕೊನೆಯುಸಿರು ಇರುವವರೆಗೂ ಕರ್ನಾಟಕ ರಾಜ್ಯದ ನೀರಾವರಿ ಸಲಹೆಗಾರರಾಗಿ ಸಲ್ಲಿಸಿದ ಅನನ್ಯವಾದ ನಿಸ್ವಾರ್ಥ ಸೇವೆ ಸ್ಮರಿಸುವಲ್ಲಿ ನಾವು ಕೃತಘ್ನರಾಗಿದ್ದೇವೆ. ಅವರ ಸೇವಾವಧಿಯಲ್ಲಿ ಯಶಸ್ವಿಯಾಗಿ ರೂಪಿಸಲಾದ ಸುಮಾರು 41 ನೀರಾವರಿ ಯೋಜನೆಗಳಲ್ಲಿ ಬಹುತೇಕ ಯೋಜನೆಗಳು ಅನುಷ್ಠಾನವಾಗಿ ಲಕ್ಷಾಂತರ ಎಕರೆ ಭೂಮಿಗೆ ನೀರಾವರಿಯಾಗಿದೆ. ಹಲವಾರು ಯೋಜನೆಗಳಿಗೆ ಸ್ವತಃ ಅಧ್ಯಯನ ನಡೆಸಿ, ನೂತನ ಆವಿಷ್ಕಾರ ಮಾಡಿದ್ದಲ್ಲದೆ ತಮ್ಮದೇ ಇಲಾಖೆಯ ಸಹ ಅಧಿಕಾರಿಗಳನ್ನು ಬಳಸಿಕೊಂಡು ಡಿಪಿಆರ್ ಸಹಾ ತಯಾರಿಸಿ,ರಾಜ್ಯದ ಬೊಕ್ಕಸಕ್ಕೆ ಉಳಿತಾಯವನ್ನೂ ಮಾಡಿಕೊಟ್ಟಿದ್ದರು. (ಇತ್ತೀಚೆಗೆ ಯಾವ ನೀರಾವರಿ ಅಧಿಕಾರಿಗೂ ಡಿಪಿಆರ್ ಮಾಡುವ ವ್ಯವಧಾನವಿಲ್ಲ, ಎಲ್ಲಾ ಡಿಪಿಆರ್ ಗಳು ಗುತ್ತಿಗೆದಾರರು ನೇಮಿಸಿದ ಖಾಸಗಿ ಸಂಸ್ಥೆಗಳೇ ಮಾಡಬೇಕು, ಖಾಸಗಿಯವರಿಗೆ ಡಿಪಿಆರ್ ತಯಾರಿಸಲು ನೂರಾರು ಕೋಟಿ ರೂಪಾಯಿ ಕೊಟ್ಟರೂ, ಅವರು ಮಾಡಿಕೊಟ್ಟ ಯೋಜನೆಗೆ ಸಾವಿರಾರು ಕೋಟಿ ರೂ.ಗಳನ್ನು ನಮ್ಮ ತೆರಿಗೆ ಹಣ ಖರ್ಚು ಮಾಡಿದರೂ ನೀರು ಮಾತ್ರ ನೋಡಲಾಗುವುದಿಲ್ಲ, ಇದಕ್ಕೆ ಜ್ವಲಂತ ಉದಾಹರಣೆ ಎತ್ತಿನಹೊಳೆ!!) ಇವೆಲ್ಲ ದಾಖಲೆಗಳು ಸುಟ್ಟು ಕರಕಲಾಗಿವೆ.
40 ವರ್ಷಗಳ ಅಧ್ಯಯನ:
ಕರ್ನಾಟಕವನ್ನು ಕಾಡುತ್ತಿರುವ ಸಮಸ್ಯೆಗಳ ಪರಿ ನೋಡಿ. ಒಂದೆಡೆ ಮಳೆಗಾಲದ ನೆರೆ, ಮತ್ತೊಂದು ಕಡೆ ಬೇಸಿಗೆಯ ಬರ. ಇವುಗಳ ಸಮಗ್ರ ಅಧ್ಯಯನ ಮಾಡಿ ನೆರೆ ಬರುವ ಪ್ರದೇಶಗಳಿಂದ ಬರ ಇರುವ ಬರಪೀಡಿತ ಬಯಲುಸೀಮೆ ಪ್ರದೇಶಗಳಿಗೆ ನೀರನ್ನು ಹರಿಸುವ ಮಾಸ್ಟರ್’ಪ್ಲಾನ್ ಮಾಡಿಕೊಟ್ಟವರನ್ನು ರಾಜ್ಯ ಮರೆತಿದೆ, ನಮ್ಮವರೂ ಕ್ರಮೇಣ ಮರೆಯುತ್ತಿದ್ದಾರೆ. ಸುಧೀರ್ಘವಾದ ಸರಕಾರೀ ಸೇವೆಯಿಂದ ನಿವೃತ್ತಿಯಾದ ನಂತರ 2014ರಲ್ಲಿ ತಮ್ಮ ದೇಹತ್ಯಾಗ ಮಾಡುವ ಕಟ್ಟ ಕಡೆಯ ಕ್ಷಣದವರೆಗೂ ಮಾಡಿದ ಯಜ್ಞ, ರಾಜ್ಯದ ರೈತರಿಗೆ ನೀರೊದಗಿಸುವ, ಜನ ಮತ್ತು ಜಾನುವಾರುಗಳಿಗೆ ಸುರಕ್ಷಿತ ಶುದ್ಧ ಕುಡಿಯುವ ನೀರು ಪೂರೈಸುವ, ಪಾತಾಳ ಸೇರಿರುವ ಅಂತರ್ಜಲ ಅಭಿವೃದ್ಧಿಪಡಿಸುವ ನಿಟ್ಟಿನಲ್ಲಿ ಅವರ 40 ವರ್ಷಗಳ ಅಧ್ಯಯನದ ಅಂಕಿ ಅಂಶಗಳುಳ್ಳ ನೂರಾರು ವರದಿಗಳು, ಸರಕಾರಕ್ಕೆ ಮಾಡಿದ ಶಿಫಾರಸ್ಸುಗಳು, ಟೊಪೊಶೀಟ್ಗಳು, ರಾಜ್ಯದ ನದಿಗಳು, ಕಾಡುವ ಪ್ರವಾಹಗಳು, ಅಣೆಕಟ್ಟುಗಳು, ಕೆರೆ ಕುಂಟೆಗಳ ಅಭಿವೃದ್ಧಿ, ಜಲಾನಯನ ಪ್ರದೇಶಗಳ ಅಭಿವೃದ್ಧಿ ಸೇರಿ ರಾಜ್ಯದ ಜಲವಿಜ್ಞಾನ ಮತ್ತು ಸಮಗ್ರ ಜಲಸಂಪನ್ಮೂಲದ ವರದಿಗಳು ಅಗ್ನಿ ಪ್ರಮಾದಕ್ಕೆ ತುತ್ತಾಗಿ ಸುಟ್ಟು ಬೂದಿ ಆಗಿಹೋಗಿವೆ.
ರಾಜ್ಯ ಕಂಡಂತೆ ನಿಜಲಿಂಗಪ್ಪನವರ ಕಾಲದಿಂದ ಇಂದಿನ ಯಡಿಯೂರಪ್ಪನವರ ವರೆಗೆ ಜಿ.ಎಸ್. ಪರಮಶಿವಯ್ಯನವರು ಖುದ್ದಾಗಿ ಬೇಟಿಯಾಗದ ಮುಖ್ಯಮಂತ್ರಿಗಳಿಲ್ಲ, ಅವರ ಸಲಹೆ ಪಡೆಯದ ನೀರಾವರಿ ಮಂತ್ರಿಗಳಿಲ್ಲ, ಅನೇಕರು ಜಿ.ಎಸ್. ಪರಮಶಿವಯ್ಯನವರ ವರದಿಗಾಗಿ ಹೊರಾಡುತ್ತಲೇ ಅಧಿಕಾರಕ್ಕೇರಿದರು ಮತ್ತೂ ಕೆಲವರು ಆತ್ಮವಂಚನೆ ಮಾಡಿಕೊಂಡು ಹಣ ಮಾಡಿಕೊಂಡರು. ತಮ್ಮ ತುಂಬು ಜೀವನದ 96 ವಸಂತಗಳನ್ನು ಪೂರೈಸಿದ ಅವರು ತಮ್ಮ ಅಂತ್ಯದ ದಿನಗಳಲ್ಲಿ ಸಾಕಷ್ಟು ಬೇಸರಗೊಂಡಿದ್ದರು, ಯಾವುದೇ ಪಕ್ಷ, ಯಾವುದೇ ಸರಕಾರ ತಮ್ಮ ಜಲಯಜ್ಞಕ್ಕೆ ಕಿವಿಗೊಡದಿದ್ದಾಗ ತಮ್ಮೆಲ್ಲಾ ವರದಿಗಳನ್ನು ವಿಧಾನಸೌಧದ ಮುಂದೆ ಸುಟ್ಟು ಹಾಕಿಬಿಡುವುದಾಗಿ ಅವರಲ್ಲಿದ್ದ ಸಾತ್ವಿಕ ಕೋಪವನ್ನು ಹೊರಹಾಕುತ್ತಿದ್ದರು. ಈಗ ಅದೇ ಆಗಿದೆ, ಅವರ ಆತ್ಮದ ನಿರಂತರ ಘೋಷ, ಅಗ್ನಿ ಪ್ರಮಾದಕ್ಕೆ ಎಡೆಮಾಡಿಕೊಟ್ಟಿದೆ.
ಸಮಾಧಾನಕರ ವಿಷಯವೆಂದರೆ ನಮ್ಮ ಬಯಲುಸೀಮೆಗೆ ಸಂಬಂಧಪಟ್ಟ ವರದಿಗಳನ್ನು ಶಾಶ್ವತ ನೀರಾವರಿ ಹೋರಾಟ ಸಮಿತಿಗೆ ಕೊಟ್ಟು ಭದ್ರಪಡಿಸಿದ್ದರು, ಮುಂದಿನ ಪೀಳಿಗೆಗಳಿಗೆ ಅತ್ಯಮೂಲ್ಯವಾದ ವೈಜ್ಞಾನಿಕ ವರದಿಗಳನ್ನು ಕ್ರೂಡೀಕರಿಸಿ ಶ್ರೀ ಜಿ.ಎಸ್. ಪರಮಶಿವಯ್ಯನವರ ನೆನಪಿನಲ್ಲಿ ಅಧ್ಯಯನ ಮತ್ತು ಮಾಹಿತಿ ಕೇಂದ್ರವನ್ನು ಸ್ಥಾಪಿಸಿ ಅವರ ಆತ್ಮ ಚಿರಶಾಂತಿಯಿಂದಿರಲು ಪ್ರಯತ್ನಿಸುತ್ತೇವೆ ಎಂದು ಶಾಶ್ವತ ನೀರಾವರಿ ಹೋರಾಟ ಸಮಿತಿ ಅಧ್ಯಕ್ಷ ಆರ್. ಆಂಜನೇಯ ರೆಡ್ಡಿ ತಿಳಿಸಿದ್ದಾರೆ.
ಬೆಂಕಿ ಅನಾಹುತದ ಬಗ್ಗೆ ಸಿಕೆನ್ಯೂಸ್ ನೌ ಜತೆ ಮಾತನಾಡಿದ ಆಂಜನೇಯ ರೆಡ್ಡಿ ಹೇಳಿದ್ದಿಷ್ಟು..
ಇದು ಅತ್ಯಂತ ಬೇಸರದ ಸಂಗತಿ. ಅವರಲ್ಲಿದ್ದ ಎಲ್ಲ ದಾಖಲೆಗಳನ್ನು ಸರಕಾರವೇ ಪಡೆದು ಸಂಗ್ರಹಿಸಿ ಸಂರಕ್ಷಿಸಬೇಕಾಗಿತ್ತು. ಆದರೆ ಅದು ಆಗಲಿಲ್ಲ. ಅನೇಕ ಯೋಜನೆಗಳನ್ನು ಸಮರ್ಥವಾಗಿ ಅನುಷ್ಠಾನಗೊಳಿಸಿದ ಜಿ.ಎಸ್. ಪರಮಶಿವಯ್ಯವರು ಅತ್ಯಂತ ವಿರಳ ನೀರಾವರಿ ತಜ್ಞರು. ಆದರೆ ದಪ್ಪ ಚರ್ಮದ ಸರಕಾರಗಳ ಬಗ್ಗೆ ಅವರಿಗೆ ಯಾವಾಗಲೂ ಸಾತ್ವಿಕವಾದ ಸಿಟ್ಟಿತ್ತು.
