ಹೈದರಾಬಾದ್‌ನಲ್ಲಿ ಕೆಜಿಎಫ್‌ ಚಾಪ್ಟರ್‌ -2 ಕ್ಲೈಯಾಕ್ಸ್‌ ಶೂಟಿಂಗ್‌ ನಿಮಿತ್ತ ರಾಮೋಜಿ ಫಿಲ್ಮ್‌ಸಿಟಿಯಲ್ಲಿ ಬಿಝಿಯಾಗಿರುವ ನಿರ್ದೇಶಕ ಪ್ರಶಾಂತ್‌ ನೀಲ್, ಶೀಘ್ರದಲ್ಲೇ ಬಾಹುಬಲಿ ಫೇಮ್‌ ಪ್ರಭಾಸ್‌ ಜತೆ ಸಿನಿಮಾ ಮಾಡುವ ಸುದ್ದಿಯೊಂದು ಟಾಲಿವುಡ್‌ನಿಂದ ಪ್ಲ್ಯಾಷ್ ಆಗಿದೆ.
‘ಸಾಹೋ’ ಚಿತ್ರದ ನಂತರ ಪ್ರಭಾಸ್‌ ಮೂರು ಬಿಗ್‌ಬಜೆಟ್‌ ಚಿತ್ರಗಳ ಕೆಲಸದಲ್ಲಿ ಬಿಝಿಯಾಗಿದ್ದು, ಪ್ರಶಾಂತ್‌ ಕೂಡ ‘ಕೆಜಿಎಫ್‌ ಚಾಪ್ಟರ್‌-2’ ಚಿತ್ರದ ಶೂಟಿಂಗ್‌ನಲ್ಲಿ ನಿರತರಾಗಿದ್ದಾರೆ. ಬಹುಶಃ ಇದು ಮುಗಿದ ಮೇಲೆ ಅವರು ಜ್ಯೂನಿಯರ್‌ ಎನ್‌ಟಿಆರ್‌ ಜತೆ ಸಿನಿಮಾ ಮಾಡಲಿದ್ದಾರೆ. ಆ ಬಗ್ಗೆ ಅವರು ಈಗಾಗಲೇ ಅನೌನ್ಸ್‌ ಮಾಡಿದ್ದಾರೆ. ಉಳಿದಂತೆ; ಎನ್‌ಟಿಆರ್‌ ಸದ್ಯಕ್ಕೆ ‘ಆರ್‌ಆರ್‌ಆರ್’ ಮಾಡುತ್ತಿದ್ದಾರೆ. ಅದಾದ ಮೇಲೆ ತ್ರಿವಿಕ್ರಮ್ ಶ್ರೀನಿವಾಸ್‌ ಜತೆ ಒಂದು ಪ್ರಾಜೆಕ್ಟ್‌ ಇದೆ. ಅದಾದ ಮೇಲೆ ಪ್ರಶಾಂತ್‌ ನೀಲ್ ಜತೆ ಎನ್‌ಟಿಆರ್‌ ಸಿನಿಮಾ ಮಾಡಲಿದ್ದಾರೆ.
ಅಂದರೆ; ಇಷ್ಟೂ ಪ್ರಾಜೆಕ್ಟ್‌ಗಳು ಮುಗಿದ ಮೇಲೆ ಪ್ರಭಾಸ್‌ ಮತ್ತು ಪ್ರಶಾಂತ್‌ ಸಿನಿಮಾ ಸೆಟ್ಟೇರಬಹುದು ಎನ್ನಲಾಗಿದೆ. ಈ ಹಿನ್ನೆಲೆಯಲ್ಲಿ ಇವರಿಬ್ಬರೂ ಒಮ್ಮೆ ಭೇಟಿಯಾಗಿದ್ದರು ಎಂಬ ಸಂಗತಿಯನ್ನು ಟಾಲಿವುಡ್‌ ಮೂಲಗಳು ಖಚಿತಪಡಿಸಿವೆ. ಪ್ರಸ್ತುತ, ರಾಮೋಜಿ ಫಿಲ್ಮ್‌ಸಿಟಿಯಲ್ಲಿ ಚಿತ್ರೀಕರಣ ಮಾಡುತ್ತಿರುವ ಪ್ರಶಾಂತ್‌ ಬಗ್ಗೆ ಟಾಲಿವಿಡ್‌ ಸಾಕಷ್ಟು ಸುದ್ದಿಗಳು ಹರಡುತ್ತಿವೆ. ಅವರ ಜತೆ ಸಿನಿಮಾ ಮಾಡಲು ಕೆಲ ನಿರ್ಮಾಪಕರು ಟ್ರೈ ಮಾಡುತ್ತಿದ್ದಾರೆಂದು ಗೊತ್ತಾಗಿದೆ.
ಪ್ರಶಾಂತ್‌ ನೀಲ್ I courtesy: Prashanth Neel Facebook page
ಇದೇ ವೇಳೆ, ಕನ್ನಡದ ಹುಡುಗಿ ಪೂಜಾ ಹೆಗಡೆ ಜತೆ ಪ್ರಭಾಸ್‌ ನಟಿಸುತ್ತಿರುವ ʼರಾಧೆ ಶ್ಯಾಮ್ʼ ಚಿತ್ರಕ್ಕೆ ಸಿದ್ಧವಾಗುತ್ತಿದ್ದಾರೆ, ಈ ಚಿತ್ರಕ್ಕೆ ರಾಧಕೃಷ್ಣ ಕುಮಾರ್‌ ನಿರ್ದೇಶನವಿದೆ. ಇದಾದ ಮೇಲೆ ನಾಗ್‌ ಅಶ್ವಿನ್‌ ನಿರ್ದೇಶನದ ಸೈನ್ಸ್‌ ಫಿಕ್ಷನ್‌ ಕಥೆಯುಳ್ಳ ಚಿತ್ರವನ್ನು ಪ್ರಭಾಸ್‌ ಓಕೆ ಮಾಡಿದ್ದಾರೆ. ಈ ಚಿತ್ರಕ್ಕೆ ಬಾಲಿವುಡ್‌ ಬೆಡಗಿ ದೀಪಿಕಾ ಪಡುಕೋಣೆ ನಾಯಕಿ. ಕೊನೆಗೆ, ಓಂ ರೌತ್‌ ನಿರ್ದೇಶನದಲ್ಲಿ ಬರುತ್ತಿರುವ ʼಆದಿಪುರುಷ್ʼ ಚಿತ್ರದಲ್ಲೂ ಪ್ರಭಾಸ್‌ ನಟಿಸುತ್ತಿದ್ದಾರೆ. ಇಷ್ಟೆಲ್ಲ ಚಿತ್ರಗಳಾದ ಮೇಲೆ ಅಥವಾ ನಡುವಿನಲ್ಲೇ ಕಾಲ್‌ಶೀಟ್‌ ಖಾಲಿ ಇದ್ದರೆ ಪ್ರಶಾಂತ್‌ ನೀಲ್ ಜತೆ ಸಿನಿಮಾ ಆಗಬಹುದು ಎನ್ನಲಾಗುತ್ತಿದೆ. ಆದಾಗ್ಯೂ ‘ಕೆಜಿಎಫ್‌ ಚಾಪ್ಟರ್‌-1’ ನೋಡಿ ಫಿದಾ ಆಗಿದ್ದ ಪ್ರಭಾಸ್‌, ಪ್ರಶಾಂತ್‌ ಜತೆ ಪಿಕ್ಚರ್ ಮಾಡುವುದು ಖಚಿತ ಎನ್ನುವ ಸುದ್ದಿಯಂತೂ ಬಂದಿದೆ.
