ಬೆಂಗಳೂರು: ಕೆಜಿಎಫ್ ರಾಕಿಭಾಯ್‌ ಮತ್ತೆ ಸದ್ದು ಮಾಡುತ್ತಿದ್ದಾರೆ. ರಾಕಿಂಗ್‌ಸ್ಟಾರ್‌ ಯಶ್ ಅಭಿಮಾನಗಳು ಖುಷಿಪಡುವಂಥ ಸಂಗತಿಗಳನ್ನು ಆ ಚಿತ್ರದ ನಿರ್ದೇಶಕ ಪ್ರಶಾಂತ್ ನೀಲ್ ಶೇರ್‌ ಮಾಡಿಕೊಂಡಿದ್ದು, ಜಾಲತಾಣಗಳಲ್ಲಿ ಕೆಜಿಎಫ್ ಚಾಪ್ಟರ್-2 ಫೋಟೋಗಳು ಧೂಳೆಬ್ಬಿಸುತ್ತಿವೆ.
ಇದೇ ವೇಳೆ ಕೆಜಿಎಫ್ ಚಾಪ್ಟರ್-2 ಟೀಸರ್ ಜನವರಿ 8ರಂದು, ಅಂದರೆ; ಯಶ್ ಹುಟ್ಟುಹಬ್ಬದಂದು ಬಿಡುಗಡೆ ಮಾಡುವುದಾಗಿ ಪ್ರಶಾಂತ್ ನೀಲ್ ಈಗಾಗಲೇ ಘೋಷಿಸಿದ್ದು, ಟೀಸರ್ ಹೇಗಿರುತ್ತದೆ ಎಂಬ ಕುತೂಹಲ ಹೆಚ್ಚಾಗಿದೆ.
ಸದ್ಯಕ್ಕೆ ಚಿತ್ರದ ಶೂಟಿಂಗ್‌ ಮುಗಿಸಿಕೊಂಡಿರುವ ಪ್ರಶಾಂತ್ ನೀಲ್, ಇದೀಗ ಅವರು ಪೋಸ್ಟ್ ಪ್ರೊಡಕ್ಷನ್ ಕೆಲಸದಲ್ಲಿ ನಿರತರಾಗಿದ್ದಾರೆ. ಇದರ ಜತೆಗೆ, ಕೆಲ ಚಿತ್ರಗಳು ಲಭ್ಯವಾಗಿದ್ದು, ಕೈಯ್ಯಲ್ಲಿ ಲಾಂಗ್‌ ಹಿಡಿದು ಕೂತಿರುವ ರಾಕಿಭಾಯ್‌ ಇಡೀ ಚಿತ್ರದ ತೀವ್ರತೆಯನ್ನು ಹೇಳುವಂತಿದೆ.
ʼಕೆಜಿಎಫ್ ಟೈಮ್ಸ್‌ʼ ಹಳೆಯ ಪೇಪರ್‌ ಕಟಿಂಗ್‌ಗಳ ಮಾದರಿಯ ಚಿತ್ರಗಳನ್ನೂ ಚಿತ್ರತಂಡ ನೀಡಿದ್ದು, ಅದರಲ್ಲಿ ಲೀಡ್‌ ಹೆಡ್‌ಲೈನ್‌ ʼನಾಯಕನಾ ಅಥವಾ ಖಳನಾಯಾಕನಾ?ʼ ಎಂದು ಇದೆ. ಚಿತ್ರದ ಕಥೆಯ ಬಗ್ಗೆ ಒಂದು ಕ್ಲೂ ಇದರಿಂದ ಸಿಗಬಹುದಾ ಎಂದು ಅಭಿಮಾನಿಗಳು ಯೋಚಿಸುತ್ತಿದ್ದಾರೆ.
