ಬೆಂಗಳೂರು: ಚಿಕ್ಕಬಳ್ಳಾಪುರ ಮತ್ತು ಕೋಲಾರ ಜಿಲ್ಲೆಯ 6 ಮಂದಿ ಪೊಲೀಸ್‌ ಇನಸ್ಪೆಕ್ಟರ್‌ಗಳ ವರ್ಗವೂ ಸೇರಿದಂತೆ ರಾಜ್ಯಾದ್ಯಂತ ಒಮ್ಮೆಲೆ 142 ಇನಸ್ಪೆಕ್ಟರ್‌ಗಳನ್ನು ಬದಲಾವಣೆ ಮಾಡಲಾಗಿದೆ.
ಕೆ.ನಾಗರಾಜ್‌ ಅವರನ್ನು ಕೋಲಾರದ ಮಹಿಳಾ ಪೊಲೀಸ್‌ ಠಾಣೆಯಿಂದ ಕೆಜಿಎಫ್‌ನ ರಾಬರ್ಟಸನ್ ವೃತ್ತಕ್ಕೆ ವರ್ಗ ಮಾಡಲಾಗಿದೆ. ಎಂ.ಸೂರ್ಯಪ್ರಕಾಶ್‌ ಅವರನ್ನು ರಾಬರ್ಟಸನ್ ಪೇಟೆ ವೃತ್ತದಿಂದ ಅದೇ ಕೆಜಿಎಫ್‌ನ ಸಿಇಎನ್‌ ಠಾಣೆಗೆ ಬದಲಿಸಲಾಗಿದೆ. ಎಂ.ವೆಂಕಟರಣಪ್ಪ ಅವರನ್ನು ಕೆಜಿಎಫ್‌ನ ಸಿಇಎನ್‌ ಠಾಣೆಯಿಂದ ಅದೇ ಕೆಜಿಎಫ್‌ನ ಉರಿಗಾಂ ವೃತ್ತಕ್ಕೆ ವರ್ಗ ಮಾಡಲಾಗಿದೆ. ರಾಜ್ಯ ಗುಪ್ತವಾರ್ತೆ ಬಿಭಾಗದಲ್ಲಿದ್ದ ಎಚ್.ಎನ್.ಚಂದ್ರಪ್ಪ ಅವರನ್ನು ಕೋಲಾರದ ಬೆಸ್ಕಾಂ ವಿಭಾಗಕ್ಕೆ ವರ್ಗಾವಣೆ ಮಾಡಲಾಗಿದೆ. ಅತ್ತಿಬೆಲೆ ವೃತ್ತದಲ್ಲಿದ್ದ ಬಿ.ಎಸ್.ಸತೀಶ್‌ ಅವರನ್ನು ಚಿಕ್ಕಬಳ್ಳಾಪುರ ಜಿಲ್ಲೆಯ ಮಹಿಳಾ ಪೊಲೀಸ್‌ ಠಾಣೆಗೆ ಬದಲಿಸಲಾಗಿದೆ. ಮುಸ್ತಾಕ್‌ ಪಾಷಾ ಅವರನ್ನು ಕೆಜಿಎಫ್‌ನ ಉರಿಗಾಂ ವೃತ್ತದಿಂದ ಕೋಲಾರದ ಮಹಿಳಾ ಪೊಲೀಸ್‌ ಠಾಣೆಗೆ ವರ್ಗ ಮಾಡಲಾಗಿದೆ.
ಎಚ್.ಎನ್.ಚಂದ್ರಪ್ಪ, ಬಿ.ಎಸ್.ಸತೀಶ್‌ ಅವರನ್ನು ಬೇರೆ ಭಾಗದಿಂದ ಕ್ರಮವಾಗಿ ಕೋಲಾರದ ಬೆಸ್ಕಾಂ ವಿಭಾಗ ಮತ್ತು ಚಿಕ್ಕಬಳ್ಳಾಪುರದ ಮಹಿಳಾ ಠಾಣೆಗೆ ಹಾಕಿರುವುದು ಬಿಟ್ಟರೆ, ಉಳಿದ ನಾಲ್ವರನ್ನು ಅಕ್ಕಪಕ್ಕದಲ್ಲೇ ಬದಲಿಸಲಾಗಿದೆ. ಉಳಿದಂತೆ ರಾಜ್ಯ ವಿವಿಧೆಡೆ ವರ್ಗ ಆಗಿರುವ ಕೆಲ ಇನಸ್ಪೆಕ್ಟರ್‌ಗಳ ವರ್ಗಾವಣೆಯನ್ನು ಕೊನೆಕ್ಷಣದಲ್ಲಿ ರದ್ದುಪಡಿಸಿ ರಾಜ್ಯ ಪೊಲೀಸ್‌ ಮಹಾನಿರ್ದೇಶಕರು ಆದೇಶ ಹೊರಡಿಸಿದ್ದಾರೆ.
ಈ ವರ್ಗಾವಣೆ ಪೈಕಿ ಕೊನೆ ಕ್ಷಣದ ಬದಲಾವಣೆ ಆಗಿದ್ದರೆ ಆ ಬಗ್ಗೆ ಮಾಹಿತಿ ಲಭ್ಯವಾಗಿಲ್ಲ.
