ಚಿಕ್ಕಬಳ್ಳಾಪುರ: ಶಿಡ್ಲಘಟ್ಟ ತಾಲ್ಲೂಕಿನ ಜಂಗಮಕೋಟೆ-ವಿಜಯಪುರ ರಸ್ತೆಯಲ್ಲಿರುವ ಬದನಕೆರೆ ಕಟ್ಟೆ ಮೇಲೆ ಚಾಲಕನ ನಿಯಂತ್ರಣ ತಪ್ಪಿ ಬೆಳಗಿನ ಜಾವ ಕ್ಯಾಂಟರ್‌ವೊಂದು ರಸ್ತೆ ಬದಿಯಲ್ಲಿದ್ದ ದುಗ್ಗಲಮ್ಮ ದೇವಿ ದೇವಾಲಯಕ್ಕೆ ಢಿಕ್ಕಿ ಹೊಡೆದಿದೆ.
ಡಿಕ್ಕಿಯ ರಭಸಕ್ಕೆ ದೇವಾಲಯ ಸಂಪೂರ್ಣವಾಗಿ ಶಿಥಿಲವಾಗಿದೆ. ಹಾಗೆಯೇ ಕ್ಯಾಂಟರ್‌ನ ಮುಂಭಾಗ ಪೂರ್ಣವಾಗಿ ಜಖಂಗೊಂಡಿದೆ. ಸ್ಥಳದಲ್ಲಿ ಕ್ಯಾಂಟರ್ ಕ್ಲೀನರ್ ಅನಿಲ್‌ ಸಾವನ್ನಪ್ಪಿದ್ದಾನೆ. ದುರಂತ ,ಸಂಭವಿಸಿದಾಗ ಆತ ಕ್ಯಾಬಿನ್‌ನಲ್ಲಿ ಮಲಗಿ ಗಾಢ ನಿದ್ರೆಯಲ್ಲಿದ್ದ. ಪಾವಗಡ ತಾಲೂಕಿನ ದೊಡ್ಡಹಳ್ಳಿ ಗ್ರಾಮದ ನಿವಾಸಿಯಾದ ಚಾಲಕ ಯಲ್ಲಪ್ಪ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ.
ಪಾವಗಡ ತಾಲ್ಲೂಕು ದೊಡ್ಡಹಳ್ಳಿಯಿಂದ ಟೊಮ್ಯಾಟೊ ತುಂಬಿದ್ದ ಕ್ಯಾಂಟರ್ ಕೋಲಾರ ಮಾರುಕಟ್ಟೆಗೆ ಬಂದು ನಂತರ ಖಾಲಿ ಮಾಡಿದ ಕ್ರೇಟ್‌ಗಳನ್ನು ತುಂಬಿಕೊಂಡು ವಾಪಸ್ ಬರುವಾಗ ಕ್ಯಾಂಟರ್ ನಿಯಂತ್ರಣ ತಪ್ಪಿರಸ್ತೆ ಬದಿ ಈ ಅವಘಡ ಸಂಭವಿಸಿದೆ.
ವೇಗದ ಚಾಲನೆ ಹಾಗೂ ಬೆಳಗಿನ ಜಾವದ ನಿದ್ದೆ ಮಂಪರು ಕಾರಣಕ್ಕೆ ಈ ಅಪಘಾತ ಸಂಭವಿಸಿರಬಹುದು ಎಂದು ಹೇಳಲಾಗಿದೆ. ಶಿಡ್ಲಘಟ್ಟ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕ್ರಮ ಜರುಗಿಸಿದ್ದಾರೆ.
