ಬೆಂಗಳೂರು: ಬಾಲಿವುಡ್‌ ಟಾಪ್‌ ಹೀರೋ ಸಲ್ಮಾನ್‌ ಖಾನ್ ಹೋಸ್ಟ್‌ ಮಾಡುತ್ತಿರುವ ಹಿಂದಿಯ ಜನಪ್ರಿಯ ರಿಯಾಲಿಟಿ ಶೋ ‘ಬಿಗ್ಬಾಸ್’ನ ಮುಂದಿನ ಆವೃತ್ತಿಯ ಮೊದಲ ಆರು ವಾರದ ಶೋ ಒಟಿಟಿಯಲ್ಲಿ ಪ್ರಸಾರವಾಗಲಿದೆ.
ಒಟಿಟಿ ವೇದಿಕೆಯಲ್ಲಿ ಪ್ರಸಾರವಾದ ನಂತರ ಟೀವಿಯಲ್ಲಿ ಪ್ರಸಾರವಾಗಲಿದ್ದು, ಹೊಸ ಆವೃತ್ತಿಗೆ “ಬಿಗ್ಬಾಸ್ ಒಟಿಟಿ” ಎಂದು ಕರೆಯಲಾಗಿದೆ. ಈ ವರ್ಷದ ಅಂತ್ಯಕ್ಕೆ ಶೋ ಆರಂಭವಾಗಲಿದೆ ಎಂದು ಪ್ರಕಟಣೆ ತಿಳಿಸಿದೆ.
ಅಂದಹಾಗೆ, ʼವೂಟ್‌ʼ ಒಟಿಟಿಯಲ್ಲಿ ಬಿಗ್ಬಾಸ್ ಸ್ಟ್ರೀಮ್ ಆಗಲಿದ್ದು, ಬಿಗ್‌ಬಾಸ್‌ನ ಈ ಹೊಸ ರೂಪವು ಸಾಮಾನ್ಯರಿಗೆ “ಬಿಗ್ಬಾಸ್ ಒಟಿಟಿ” ಮೂಲಕ ಭರ್ತಿ ಮನರಂಜನೆ ನೀಡಲಿದೆ. ಈ ಮೂಲಕ ಜನರು ಎಲ್ಲೇ ಇದ್ದರೂ 24/7 ಬಿಗ್ಬಾಸ್ ಶೋ ನೋಡಿ ಆನಂದಿಸಬಹುದಾಗಿದೆ.
ಈ ವರ್ಷದ ಬಿಗ್ಬಾಸ್ ಶೋ ಬಹಳ ಕುತೂಹಲ ಕೆರಳಿಸಿದೆ. ಭಾವನಾತ್ಮಕ ಅಂಶಗಳೂ ಸೇರಿ ವ್ಯಕ್ತಿತ್ವದ ನಾನಾ ಮುಖಗಳನ್ನು ಪರಿಚಯಿಸುವ ಶೋ ಇದಾಗಿರುವುದರಿಂದ ದೇಶಾದ್ಯಂತ ಎಲ್ಲರ ಕಾತರವನ್ನೂ ಹೆಚ್ಚಿಸಿದೆ.
