ಹೈದರಾಬಾದ್: ಕೆಲ ದಿನಗಳ ಹಿಂದೆ ಅಪಘಾತದಲ್ಲಿ ತೀವ್ರವಾಗಿ ಗಾಯಗೊಂಡು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಟಾಲಿವುಡ್‌ ನಟ ಹಾಗೂ ಸಿನಿಮಾ ವಿಮರ್ಶಕ, ಆಂಕರ್‌ ಕತ್ತಿ ಮಹೇಶ್ ನಿಧನರಾಗಿದ್ದಾರೆ.
ಇವರ ನಿಧನದಿಂದ ಟಾಲಿವುಡ್‌ ತೀವ್ರ ಶಾಕ್‌ಗೆ ಗುರಿಯಾಗಿದ್ದು, ಚಿತ್ರ ನಟರಾದ ನಾನಿ, ಮಂಚು ಮನೋಜ್‌, ಸೇರಿದಂತೆ ಅನೇಕ ತಾರೆಯರು ತೀವ್ರ ಆಘಾತ ವ್ಯಕ್ತಪಡಿಸಿದ್ದಾರೆ.
ಕಳೆದ ತಿಂಗಳು ಜೂನ್‌ 26ರಂದು ಸ್ವತಃ ಕತ್ತಿ ಮಹೇಶ್ ಅವರೇ ಚಲಾಯಿಸಿಕೊಂಡು ಬರುತ್ತಿದ್ದ ಇನೋವಾ ಕಾರು ನೆಲ್ಲೂರು ಜಿಲ್ಲೆಯ ಕೊಡವಲೂರು ಭಲಿಯ ಚಂದ್ರಶೇಖರಪುರಂ ಎಂಬಲ್ಲಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಬಳಿ ಅಪಘಾತಕ್ಕೀಡಾಗಿತ್ತು.
ಚಿತ್ತೂರಿನಿಂದ ಹೈದರಾಬಾದ್ ಕಡೆಗೆ ಬರುತ್ತಿರುವಾಗ ದುರಂತ ಸಂಭವಿಸಿತ್ತು. ಮಹೇಶ್ ಅವರ ತಲೆ ಮತ್ತು ಮೂಗಿಗೆ ತೀವ್ರ ರೀತಿಯ ಗಾಯಗಳಾಗಿದ್ದವು. ಕಳೆದ 14 ದಿನಗಳಿಂದ ಚೆನ್ನೈನ ಅಪೊಲೋ ಆಸ್ಪತ್ರೆಯ ಐಸಿಯುನಲ್ಲಿ ಜೀವನ್ಮರಣ ಹೋರಾಟ ನಡೆಸಿದ್ದ ಮಹೇಶ್ ಅವರಿಗೆ ವೆಂಟಿಲೇಟರ್ ಮೇಲೆಯೇ ಇದ್ದರು. ಅವರು ಚಿಕಿತ್ಸೆ ಫಲಕಾರಿಯಾಗದೇ ಭಾನುವಾರ ಕೊನೆಯುಸಿರೆಳೆದರು.
ಕತ್ತಿ ಮಹೇಶ್ ಅವರು ಬಿಗ್‌ಬಾಸ್‌ ಸೀಜನ್‌ ೧ರಲ್ಲಿ ಭಾಗಿಯಾಗಿದ್ದರು. ಬಳಿಕ ಸೋಶಿಯಲ್ ಮೀಡಿಯಾದಲ್ಲಿ ಅವರ ಫಾಲೋಯಿಂಗ್‌ ಭಾರೀ ಪ್ರಮಾಣದಲ್ಲಿ ಹೆಚ್ಚಾಗಿತ್ತು. ಜತೆಗೆ, ‘ನೇನೆ ರಾಜು ನೇನೇ ಮಂತ್ರಿ’, ‘ಕ್ರ್ಯಾಕ್‌‘, ‘ಅಮ್ಮ ರಾಜ್ಯಂಲೋ ಕಡಪ ಬಿಡ್ಡಲು’ ಸೇರಿ ಹಲವಾರು ಸಿನಿಮಾಗಳಲ್ಲಿ ನಟಿಸಿದ್ದರು. ಅಲ್ಲದೆ, ಯುಟ್ಯೂಬ್‌ನಲ್ಲಿ ಅವರ ಸಿನಿಮಾ ವಿಮರ್ಶೆಗಳು ಬಹಳ ಜನಪ್ರಿಯವಾಗಿದ್ದವು.
ಆಸ್ಪತ್ರೆಯಲ್ಲಿ ಕತ್ತಿ ಮಹೇಶ್ ಚಿಕಿತ್ಸೆಗೆ 17 ಲಕ್ಷ ವೆಚ್ಚವಾಗಿದ್ದು, ಆ ಮೊತ್ತವನ್ನು ಆಂಧ್ರ ಪ್ರದೇಶದ ವೈ.ಎಸ್.ಜಗನ್ಮೋಹನ್‌ ರೆಡ್ಡಿ ಅವರ ಸರಕಾರ ಭರಿಸಿದೆ.
