ಜಿಲ್ಲಾಧ್ಯಕ್ಷರು, ಶಾಸಕರ ಸಮ್ಮುಖದಲ್ಲಿ ನೂತನ ಕಸಾಪ ತಂಡ ಅಧಿಕಾರ ಸ್ವೀಕಾರ
by GS Bharath Gudibande
ಗುಡಿಬಂಡೆ: ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ನೂತನ ಪದಾಧಿಕಾರಿಗಳ ಪದಗ್ರಹಣ ಕಾರ್ಯಕ್ರಮವನ್ನು ಇದೇ 27ರ ಬುಧವಾರ ಆಯೊಜಿಸಲಾಗಿದೆ ಎಂದು ತಾಲೂಕು ಕಸಾಪ ಅಧ್ಯಕ್ಷ ಕವಿ ಸುಬ್ಬರಾಯಪ್ಪ ತಿಳಿಸಿದ್ದಾರೆ.
ಪಟ್ಟಣದ ಪ್ರವಾಸಿ ಮಂದಿರದಲ್ಲಿ ಆಯೋಜಿಸಲಾಗಿದ್ದ ಪತ್ರಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು; ಪಟ್ಟಣದ ಗಾಯತ್ರಿ ಪ್ರಸಾದ ಭವನದಲ್ಲಿ 27ರ ಬುಧವಾರ ನಿಕಟಪೂರ್ವ ಅಧ್ಯಕ್ಷೆ ಅನುರಾಧ ಆನಂದ್ ಅವರಿಂದ ತಾಲೂಕು ಕಸಾಪ ಅಧ್ಯಕ್ಷರ ಅಧಿಕಾರ ಹಸ್ತಾಂತರ ಸೇರಿದಂತೆ ನೂತನ ಕಸಾಪ ತಂಡದ ಪದಗ್ರಹಣ ಕಾರ್ಯಕ್ರವನ್ನು ಆಯೋಜಿಸಲಾಗಿದೆ ಎಂದರು.
ಆಜೀವ ಸದಸ್ಯರಿಗೂ ಆಹ್ವಾನ
ಗುಡಿಬಂಡೆ ತಾಲೂಕಿನಲ್ಲಿ 577 ಸದಸ್ಯರಿದ್ದು, ಪ್ರತಿಯೊಬ್ಬರಿಗೂ ಮಾಧ್ಯಮಗಳ ಮೂಲಕ ಆಹ್ವಾನ ನೀಡುತ್ತಿದ್ದೇವೆ ಹಾಗೂ ಮುಂದಿನ ದಿನಗಳಲ್ಲಿ ತಾಲೂಕು ಸಮ್ಮೇಳನ ಸೇರಿದಂತೆ ತಾಲೂಕಿನಲ್ಲಿ ಕಸಾಪ ವಿಶೇಷತೆ, ಹಲವು ಕಾರ್ಯಕ್ರಮಗಳು, ವಿಚಾರಗೋಷ್ಠಿ ಹೀಗೆ ಹತ್ತು ಹಲವು ಕಾರ್ಯಕ್ರಮಗಳನ್ನು ಎಲ್ಲಾ ಸದಸ್ಯರು ಒಟ್ಟಾಗಿ ಮಾಡುವ ಮೂಲಕ ಜಿಲ್ಲಾ ಮತ್ತು ರಾಜ್ಯಕ್ಕೆ ಗುಡಿಬಂಡೆ ಕಸಾಪ ಮಾದರಿಯಾಗಬೇಕು ಎಂಬ ಉದೇಶವಿದೆ ಎಂದು ಅವರು ಹೇಳಿದರು.
ವಿಶೇಷ ಆಹ್ವಾನಿತರು
ಈ ಕಾರ್ಯಕ್ರಮಕ್ಕೆ ಶಾಸಕ ಎಸ್.ಎನ್.ಸುಬ್ಬಾರೆಡ್ಡಿ, ಕಸಾಪ ಜಿಲ್ಲಾಧ್ಯಕ್ಷ ಡಾ.ಕೋಡಿ ರಂಗಪ್ಪ, ಜಿಲ್ಲಾ ಮಟ್ಟದ ಪದಾಧಿಕಾರಿಗಳು, ಜಿಲ್ಲೆಯ ವಿವಿಧ ತಾಲೂಕುಗಳ ಅಧ್ಯಕ್ಷರು, ಗುಡಿಬಂಡೆ ತಾಲೂಕಿನ ನಿಕಟ ಪೂರ್ವ ಅಧ್ಯಕ್ಷರು, ನೂತನ ಪಧಾಧಿಕಾರಿಗಳ ತಂಡ, ಹಾಗೂ ತಾಲೂಕಿನ ಎಲ್ಲಾ ಆಜೀವ ಸದಸ್ಯರು ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ ಎಂದು ಅವರು ಮಾಹಿತಿ ನೀಡಿದರು.
ಈ ಸಂದರ್ಭದಲ್ಲಿ ಕಸಾಪ ನಿಕಟ ಪೂರ್ವ ಗೌರವ ಕಾರ್ಯದರ್ಶಿ ವಿ.ಶ್ರೀರಾಮಪ್ಪ, ಕಸಾಪ ಸದಸ್ಯರಾದ ನವೀನ್ ರಾಜ್ ಕನ್ನಡಿಗ, ಫಯಾಜ್ ಅಹಮದ್, ತಿಮ್ಮಾರೆಡ್ಡಿ, ಜಾನಪದ ರಾಜಪ್ಪ, ಪತ್ರಕರ್ತ ಸಂಘದ ಅಧ್ಯಕ್ಷ ಬಿ.ಮಂಜುನಾಥ್ ಸೇರಿದಂತೆ ಮುಂತಾದವರು ಭಾಗವಹಿಸಿದ್ದರು.
ಪದಗ್ರಹಣ ಕಾರ್ಯಕ್ರಮಕ್ಕೆ ಗುಡಿಬಂಡೆ ತಾಲೂಕಿನ ಕಸಾಪ ಆಜೀವ ಸದಸ್ಯತ್ವ ಹೊಂದಿರುವ ಎಲ್ಲಾ ಸದಸ್ಯರು ಹಾಗೂ ತಾಲೂಕಿನ ಕನ್ನಡ ಪರ ಸಂಘ ಸಂಸ್ಥೆಗಳು, ರೈತ, ದಲಿತ ಸಂಸ್ಥೆಗಳು ಹಾಗೂ ಕನ್ನಡ ಪರ ಮನಸ್ಸುಗಳು ಸೇರಿ ತಾಲೂಕಿನ ಎಲ್ಲಾ ಹಿರಿಯರು ಪಾಲ್ಗೊಳ್ಳಬೇಕು ಎಂಬುದು ನಮ್ಮೆಲ್ಲರ ಅಭಿಲಾಶೆ. ಪದಗ್ರಹಣ ದಿನ ತುರ್ತಾಗಿ ನಿಗದಿ ಆಗಿರುವುದರಿಂದ ಎಲ್ಲಾ ಸದಸ್ಯರಿಗೂ ಆಹ್ವಾನ ತಲುಪಿಸಲು ಸಾಧ್ಯವಾಗದ ಕಾರಣ ಎಲ್ಲರಿಗೂ ಮಾಧ್ಯಮಗಳ ಮೂಲಕ ಆಹ್ವಾನ ನೀಡುತ್ತಿದ್ದೇವೆ.
ಕವಿ ಸುಬ್ಬರಾಯಪ್ಪ, ಕಸಾಪ ಅಧ್ಯಕ್ಷರು, ಗುಡಿಬಂಡೆ
