ಮುಖವೀಣೆ ಆಂಜನಪ್ಪ ಅವರನ್ನು ಹುಡುಕಿಕೊಂಡು ಬಂದ ಪ್ರಶಸ್ತಿ
ಗುಡಿಬಂಡೆ: ರಾಜ್ಯದ ಅತ್ಯಂತ ಹಿಂದುಳಿದ ತಾಲ್ಲೂಕು ಎಂದೇ ಕುಖ್ಯಾತಿಯಾಗಿರುವ ಗುಡಿಬಂಡೆ ಕಲೆಯಲ್ಲಿ ಮಾತ್ರ ಸಿರಿವಂತಿಕೆ ಕಾಪಿಟ್ಟುಕೊಂಡಿದೆ. ಅದಕ್ಕೆ ಸಾಕ್ಷಿ ಎನ್ನುವಂತೆ ಈ ನೆಲದ ಅಭಿಜಾತ ಕಲಾವಿದ ಮುಖವೀಣೆ ಆಂಜನಪ್ಪ ಅವರನ್ನು ರಾಜ್ಯೋತ್ಸವ ಪ್ರಶಸ್ತಿ ಹುಡುಕಿಕೊಂಡು ಬಂದಿದೆ.
ಹಿಂದೆ ಎಂದೋ ಸಿಗಬೇಕಿದ್ದ ಈ ಪ್ರಶಸ್ತಿ ಕೊನೆಗೂ ಅವರಿಗೆ ವರಿಸಿದೆ. ಆ ಮೂಲಕ ಆ ಪ್ರಶಸ್ತಿಯ ಹೊಳಪು ಹೆಚ್ಚಾಗಿದೆ.
ಮೂಲತಃ ತುಮಕೂರು ಜಿಲ್ಲೆಯ ಮಧುಗಿರಿ ತಾಲ್ಲೂಕಿನ ಚಿಕ್ಕದಾಳವಟ್ಟ ಎಂಬ ಗ್ರಾಮದ ತಿಮ್ಮಮ್ಮ-ತಿಮ್ಮಪ್ಪ ದಂಪತಿ ಪುತ್ರರಾದ ಆಂಜನಪ್ಪ ಅವರು ಸುಮಾರು 50 ವರ್ಷಗಳಿಂದ ಗುಡಿಬಂಡೆಯ ತಾಲೂಕಿನ ದಪ್ಪರ್ತಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಗವಿಕುಂಟಹಳ್ಳಿ (ಕಾಟೈಗಾರಹಳ್ಳಿ) ಯಲ್ಲಿ ಜೀವಿಸುತ್ತಿದ್ದಾರೆ. ಅವರ ಪತ್ನಿ ಹೆಸರು ಶ್ರೀಮತಿ ಲಕ್ಷಮ್ಮ.
ತಮ್ಮ ಪೂರ್ವಜರು ಹೊಟ್ಟೆಪಾಡಿಗಾಗಿ ನುಡಿಸುತ್ತಿದ್ದ ಮುಖವೀಣೆನ್ನೇ (ಇದು ಶಹನಾಯ್‌ ಮಾದರಿಯ ವಾದ್ಯ) ಅದ್ಭುತ ಪ್ರಾಚೀನ ಜಾನಪದ ಕಲೆಯನ್ನು ಮೈಗೂಡಿಸಿಕೊಂಡು, ಹಳ್ಳಿಯಿಂದ ದೆಹಲಿವರೆಗೆ ಅದರ ಪ್ರದರ್ಶನ ನೀಡುತ್ತಾ ಶ್ರೋತೃಗಳನ್ನು ಬೆರಗಿನಲ್ಲಿ ಮುಳುಗಿಸುವ ಈ ವೀಣೆಯ ಮಾಂತ್ರಿಕನಿಗೆ ಇಂದಿಗೂ ವಾಸಿಸಲು ಸುಸಜ್ಜಿತವಾದ ಒಂದು ಮನೆ ಇಲ್ಲ. ಮಹಾನ್‌ ಕಲಾವಿದನೊಬ್ಬ ಇವತ್ತು ಸೂರಿಗಾಗಿ ಅವರಿವರ ಮುಂದೆ ಬೇಡಿಕೊಳ್ಳುವ ಸ್ಥಿತಿ ಇರುವುದು ಅತ್ಯಂತ ನೋವಿನ ಸಂಗತಿ.
ಸಂಗೀತವನ್ನು ಶಾಸ್ತ್ರೀಯವಾಗಿ ಅಭ್ಯಾಸ ಮಾಡಿರುವ ಆಂಜನಪ್ಪ ಅವರು ‘ಕನಗಾಂಗಿಯ’ ದಿಂದ ಹಿಡಿದು ‘ರಸಿಕಪ್ರಿಯ’ ತನಕ 72 ಮೇಳಕರ್ತ ರಾಗಗಳನ್ನು ಸುಲಲಿತವಾಗಿ ಮುಖವೀಣೆಯಲ್ಲಿ ನುಡಿಸಬಲ್ಲರು. ರಾಜ್ಯದಲ್ಲಿ ಮಾತ್ರವಲ್ಲದೆ ನೆರೆಯ ತಮಿಳುನಾಡು, ಆಂಧ್ರಪ್ರದೇಶ, ಕೇರಳ ರಾಜ್ಯಗಳಲ್ಲಿ ಕೂಡ ಅವರು ಪ್ರದರ್ಶನ ನೀಡಿದ್ದಾರೆ.
ಶಿಕ್ಷಣ ತಜ್ಞ ಎಚ್ ನರಸಿಂಹಯ್ಯ, ವರನಟ ಡಾ.ರಾಜಕುಮಾರ್, ಮೇರು ಗಾಯಕ ಘಂಟಸಾಲ, ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ವಿರೇಂದ್ರ ಹೆಗ್ಗಡೆ ಅವರು ಸೇರಿದಂತೆ ಅನೇಕರ ಎದುರು ತಮ್ಮ ವಿಶಿಷ್ಟ ಕಲೆಯನ್ನು ಪ್ರದರ್ಶಿಸಿ ಭೇಷ್ ಎನಿಸಿಕೊಂಡಿದ್ದಾರೆ ಆಂಜಿನಪ್ಪ ಅವರು.
ಅವರ ಕಲೆಯನ್ನು ಮೆಚ್ಚಿ ಈವರೆಗೆ ಅನೇಕ ಸಂಘ-ಸಂಸ್ಥೆಗಳು, ಮಠಗಳು ಸನ್ಮಾನಿಸಿವೆ. ದುರ್ದೈವವೆಂದರೆ ಆಂಜನಪ್ಪ ಅವರಿಗೆ ಸಂದಿರುವ ಸನ್ಮಾನಗಳಲ್ಲಿ ಬಂದಿರುವ ಸ್ಮರಣಿಕೆಗಳನ್ನು ಜೋಡಿಸಿಡಲು ಅವರಿಗೊಂದು ಚಿಕ್ಕ ಮನೆ ಕೂಡ ಇಲ್ಲ. ಜೋಪಡಿಯಲ್ಲಿ ಜೀವನ ನಡೆಸುವ ಸ್ಥಿತಿಯಲ್ಲಿರುವ ಈ ದೊಡ್ಡ ಕಲಾವಿದನಿಗೆ ದೊರೆಯಬೇಕಾದ ನಿಜವಾದ ಗೌರವ ಈವರೆಗೆ ದೊರೆತಿಲ್ಲ.
ಜಾನಪದ ಯಕ್ಷಗಾನ ಅಕಾಡಮಿ ಪ್ರಶಸ್ತಿ, ದೂರದರ್ಶನ ಕೊಡಮಾಡುವ ಚಂದನ ಪ್ರಶಸ್ತಿ, ಜಾನಪದ ಕಲಾಶ್ರೀ ಪ್ರಶಸ್ತಿ, ಸ್ಟೇಟ್ ಬ್ಯಾಂಕ್ ಆಫ್ ಮೈಸೂರು ನೀಡುವ ರಾಜ್ಯೋತ್ಸವ ಪ್ರಶಸ್ತಿ, ಜಿಲ್ಲಾ ಪ್ರಶಸ್ತಿ, ಎಲ್.ಎಚ್. ಆರ್ ಪತ್ರಿಕಾ ಪ್ರಶಸ್ತಿ, ಆದರ್ಶ ಶೃಂಗ ಪ್ರಶಸ್ತಿ, ಜಾನಪದ ಲೋಕೋತ್ಸವ ಪ್ರಶಸ್ತಿ, ಶಾರದ ಪ್ರಶಸ್ತಿ, ಉನ್ನತಿ ಜಾನಪದ ಕಲಾಶ್ರೀ ಪ್ರಶಸ್ತಿ, ಮೇಳಾದೇವಿ ಉತ್ಸವ ಪ್ರಶಸ್ತಿ ಸೇರಿದಂತೆ ಹತ್ತಾರು ಪ್ರಶಸ್ತಿಗಳು ಇವರಿಗೆ ಸಂದಿವೆ.
ಜೀವನದ ಸಂಧ್ಯಾಕಾಲದಲ್ಲಿರುವ ಆಂಜನಪ್ಪ ಅವರಿಗೆ ಸೂರಿಲ್ಲ ಎನ್ನುವ ಕೊರಗು ಸಂದಿರುವ ಪ್ರಶಸ್ತಿಗಳ ಸಂತಸವನ್ನು ಕಳೆದು ಹಾಕಿದೆ. ಇನ್ನಾದರೂ ಜಿಲ್ಲಾಡಳಿತ ಅಥವಾ ಸರ್ಕಾರ ಈ ಮೇರು ಕಲಾವಿದನಿಗೆ ಮನೆ ಕಟ್ಟಿಸಿಕೊಟ್ಟು ನೆಮ್ಮದಿ, ಘನತೆಯಿಂದ ಬದುಕುವ ವ್ಯವಸ್ಥೆ ಮಾಡಿಕೊಡಬೇಕು ಎನ್ನುವುದು ಪ್ರಜ್ಞಾವಂತ ನಾಗರಿಕರ ಆಗ್ರಹವಾಗಿದೆ.
