ಬೆಂಗಳೂರು: ಭೂಗತ ಲೋಕದ ಕಥೆಯನ್ನು ತೆರೆಮೇಲೆ ತೋರಿಸುವುದರಲ್ಲಿ ನಿರ್ದೇಶಕ ರಾಮ್ಗೋಪಾಲ್ ವರ್ಮ ನಿಸ್ಸೀಮರು. ಈಗಾಗಲೇ ಅವರ ಬತ್ತಳಿಕೆಯಿಂದ ಈ ರೀತಿಯ ಸಿನಿಮಾಗಳು ಬಂದಿವೆ. ಅವುಗಳಲ್ಲಿ ಕೆಲವು ಹಿಟ್‌ ಆಗಿವೆ. ಇದೀಗ ಡಿ ಕಂಪನಿ ಮೂಲಕ ಮತ್ತೆ ಭೂಗತ ಲೋಕವನ್ನು ಅನಾವರಣ ಮಾಡುತ್ತಿದ್ದಾರೆ ಅವರು.
ಅದರಂತೆ ವರ್ಮ ಶನಿವಾರದಂದು ಡಿ ಕಂಪನಿ ಚಿತ್ರದ ಟೀಸರ್ ಬಿಡುಗಡೆ ಆಗಿದೆ. ಸ್ವತಃ ಆರ್ಜಿವಿ ತಮ್ಮ ಸೋಷಿಯಲ್ ಮೀಡಿಯಾಗಳಲ್ಲಿ ಟೀಸರ್ ಲಿಂಕ್ ಶೇರ್ ಮಾಡಿದ್ದು, ಯೂಟ್ಯೂಬ್ ಚಾನೆಲ್ʼನಲ್ಲಿ ಅಪ್ಲೋಡ್ ಮಾಡಲಾಗಿದೆ.
ಭೂಗತ ಪಾತಕಿ ದಾವುದ್ ಇಬ್ರಾಹಿಂ ಬಯೋಪಿಕ್ ನಿರ್ದೇಶನ ಮಾಡಿದ್ದಾರೆ ರಾಮ್ಗೋಪಾಲ್ ವರ್ಮ. ಈ ಮೊದಲು 2002ರಲ್ಲಿ ʼಕಂಪನಿʼ ಸಿನಿಮಾ ನಿರ್ಮಾಣ ಮಾಡಿದ್ದ ಆರ್ಜಿವಿ, ಇದೀಗ ಡಿ ಕಂಪನಿ ಮೂಲಕ ರಾಜಕೀಯ, ಕ್ರೈಂ ಮತ್ತು ಪಾತಕ ಲೋಕದ ಎಳೆಯನ್ನು ಬಿಚ್ಚಿಟ್ಟಿದ್ದಾರೆ. ಈ ಮೊದಲಿನ ಕಂಪನಿಯಲ್ಲಿ ದಾವುದ್ ಇಬ್ರಾಹಿಂ ಮತ್ತು ಛೋಟಾ ರಾಜನ್ ಬಗ್ಗೆ ಮಾಹಿತಿ ನೀಡಲಾಗಿತ್ತು. ಇದೀಗ ಸಿದ್ಧವಾಗಿರುವ ಡಿ ಕಂಪನಿಯಲ್ಲಿ ನೇರವಾಗಿ ಕರಾಚಿಯ ಕಥೆ ತೆರೆದುಕೊಳ್ಳಲಿದೆ.
ಈಗಾಗಲೇ ಫಸ್ಟ್ʼಲುಕ್ ಮೂಲಕ ಸಾಕಷ್ಟು ಸದ್ದು ಮಾಡಿರುವ ಡಿ ಕಂಪನಿ ಸಿನಿಮಾ ಇದೀಗ ಒಟ್ಟು ಐದು ಭಾಷೆಗಳಲ್ಲಿ ಬಿಡುಗಡೆ ಆಗಲು ಸಿದ್ಧತೆ ಮಾಡಿಕೊಂಡಿದೆ. ತೆಲುಗು, ಕನ್ನಡ, ಹಿಂದಿ, ತಮಿಳು ಮತ್ತು ಮಲೆಯಾಳಂ ಭಾಷೆಗಳಲ್ಲಿ ಚಿತ್ರಮಂದಿರದಲ್ಲಿಯೇ ಈ ಸಿನಿಮಾ ಬಿಡುಗಡೆ ಆಗಲಿದೆ. ಸದ್ಯ ಎಲ್ಲ ಭಾಷೆಗಳ ಟೀಸರ್ ಬಿಡುಗಡೆ ಆಗಿದ್ದು, ಶೀಘ್ರದಲ್ಲಿ ಚಿತ್ರದ ಬಿಡುಗಡೆ ದಿನಾಂಕವನ್ನೂ ತಂಡ ಘೋಷಿಸಿಕೊಳ್ಳಲಿದೆ. ಬಹುತೇಕ ಹೊಸಬರನ್ನೇ ಹಾಕಿಕೊಂಡು ಸಿನಿಮಾ ಮಾಡಿದ್ದಾರೆ ಆರ್ಜಿವಿ.
