4.65 ಕೋಟಿ ಶ್ರಮಿಕ ವರ್ಗ ಸಂಕಷ್ಟದಲ್ಲಿ
- ಮುಖ್ಯಾಂಶಗಳು
- 4.65 ಕೋಟಿಯಷ್ಟು ಶ್ರಮಿಕ ವರ್ಗ ಬಡತನದಿಂದ ಕುಗ್ಗಿ ಹೋಗಿದ್ದಾರೆ.
- ಚುನಾವಣಾ ವ್ಯವಸ್ಥೆ ಪ್ರಾಮಾಣಿಕವಾಗಿಲ್ಲ.
- ಚುನಾವಣೆ ವ್ಯವಸ್ಥೆಯಲ್ಲಿ ಬದಲಾವಣೆ ತರದಿದ್ದರೆ ಪ್ರಗತಿ ಸಾಧ್ಯವಿಲ್ಲ.
- ಬಣ್ಣಬಣ್ಣದ ಜಾಹೀರಾತುಗಳಿಂದ ತೋರಿಕೆಯ ಪ್ರಗತಿ ಸರಿಯಲ್ಲ
- ಚುನಾವಣಾ ವ್ಯವಸ್ಥೆಯ ಸುಧಾರಣೆಯೊಂದೇ ಎಲ್ಲ ಸಮಸ್ಯೆಗಳಿಗೂ ಪರಿಹಾರ
- ಗಣರಾಜ್ಯೋತ್ಸವ ಭಾಷಣದಲ್ಲಿ ಮಾಜಿ ಮುಖ್ಯಮಂತ್ರಿಗಳ ಪ್ರತಿಪಾದನೆ
- ಆರ್ಥಿಕ ಅಸಮಾನತೆ ನಿವಾರಣೆ ಆಗದಿದ್ದರೆ ಸ್ವಾತಂತ್ರ್ಯ & ಗಣರಾಜ್ಯಕ್ಕೆ ಅರ್ಥವಿಲ್ಲ ಎಂದ ಹೆಚ್‌ಡಿಕೆ
ಬೆಂಗಳೂರು: ರಾಜ್ಯ ಮತ್ತು ದೇಶದಲ್ಲಿ ಆರ್ಥಿಕ ಅಸಮಾನತೆ ಹೆಚ್ಚುತ್ತಲೇ ಇದೆ. ಕೆಲವರಷ್ಟೇ ಸಿರಿವಂತರಾಗುತ್ತಿರುವ ಸಂದರ್ಭದಲ್ಲಿ ಕೇವಲ ಪ್ರಚಾರದಿಂದ ಜನರನ್ನು ಉದ್ಧಾರ ಮಾಡುವ ಅಥವಾ ಒಲಿಸಿಕೊಳ್ಳುವುದು ಸಾಧ್ಯವಿಲ್ಲ ಹಾಗೂ ದೇಶ ಎದುರಿಸುತ್ತಿರುವ ಎಲ್ಲ ಸಮಸ್ಯೆಗಳಿಗೆ ಚುನಾವಣೆ ವ್ಯವಸ್ಥೆಯ ಸುಧಾರಣೆಯೊಂದೇ ಪರಿಹಾರ ಎಂದು ಮಾಜಿ ಮುಖ್ಯಮಂತ್ರಿಗಳಾದ ಹೆಚ್.ಡಿ.ಕುಮಾರಸ್ವಾಮಿ ಅವರು ಪ್ರತಿಪಾದಿಸಿದರು.
73ನೇ ಗಣರಾಜ್ಯೋತ್ಸವದ ಪ್ರಯುಕ್ತ ಜೆಡಿಎಸ್ ಪಕ್ಷದ ರಾಜ್ಯ ಕಚೇರಿ ಜೆಪಿ ಭವನದಲ್ಲಿಂದು ಧ್ವಜಾರೋಹಣ ನೆರೆವೇರಿಸಿ ಭಾಷಣ ಮಾಡಿದ ಮಾಜಿ ಮುಖ್ಯಮಂತ್ರಿಗಳು; “ಅನೇಕ ಸಾಧನೆಗಳನ್ನು ಮಾಡಿದ್ದೇವೆ ಎಂದು ಸರಕಾರ ಬಣ್ಣ-ಬಣ್ಣದ ಜಾಹೀರಾತುಗಳನ್ನು ನೀಡಿದೆ. ಆದರೆ, ಆ ಜಾಹೀರಾತುಗಳಲ್ಲಿ ನೀಡಿರುವ ಮಾಹಿತಿ ಸತ್ಯವೇ ಎಂಬುದನ್ನು ಒಮ್ಮೆ ಸರಕಾರ ಆತ್ಮಾವಲೋಕನ ಮಾಡಿಕೊಳ್ಳಬೇಕು” ಎಂದರು.
ದೇಶ ಸ್ವಾತಂತ್ರ್ಯದ ಅಮೃತ ಮಹೋತ್ಸವದ ವರ್ಷದಲ್ಲಿದೆ. ಇವತ್ತು 73ನೇ ಗಣರಾಜ್ಯೋತ್ಸವದ ಆಚರಣೆ ಮಾಡುತ್ತಿದ್ದೇವೆ. ಇಂಥ ಸಂದರ್ಭದಲ್ಲಿ ಸರಕಾರಗಳು ಯೋಚನೆ ಮಾಡಬೇಕು. ಶ್ರೀಮಂತರು ಇನ್ನೂ ಶ್ರೀಮಂತರಾಗುತ್ತಿದ್ದರೆ, ಬಡವರು ಮತ್ತಷ್ಟು ಬಡವರಾಗುತ್ತಿದ್ದಾರೆ ಎಂದು ಹೇಳಿದ ಅವರು, ಒಂದು ಉದಾಹರಣೆ ಮೂಲಕ ಆ ಪರಿಸ್ಥಿತಿಗೆ ಕನ್ನಡಿ ಹಿಡಿದರು.
ಅವರು ಹೇಳಿದ್ದಿಷ್ಟು
“ವಿಜಯಪುರದ ಬಡ ಕುಟುಂಬವೊಂದರ ತಂದೆ ತಾಯಿ, ಅಕ್ಷಯ್‌ ಚೌಹಾಣ್‌ ಎಂಬ ತಮ್ಮ ಆರು ವರ್ಷದ ಅನಾರೋಗ್ಯ ಪೀಡಿತ ಮಗುವಿನೊಂದಿಗೆ ಬಿಡದಿಯ ತೋಟಕ್ಕೆ ನನ್ನನ್ನು ಹುಡುಕಿಕೊಂಡು ಬಂದಿದ್ದರು. ಯಾರು ಅವರಿಗೆ ನನ್ನ ತೋಟದ ಮನೆಯ ವಿಳಾಸ ಕೊಟ್ಟಿದ್ದರೋ ಗೊತ್ತಿಲ್ಲ. ಇಂದು ಬೆಳಗ್ಗೆಯೇ ಆಟೋದಲ್ಲಿ ಬೆಂಗಳೂರಿನಿಂದ ಕೇತಿಗಾನಹಳ್ಳಿಯ ತೋಟಕ್ಕೆ ಕೊರೆಯುವ ಚಳಿಯಲ್ಲೇ ಬಂದಿದ್ದರು. ಅಷ್ಟು ದೂರದಿಂದ ಅವರು ಬೆಂಗಳೂರಿಗೆ ಬಂದಿದ್ದಾರೆ. ಅವರಿಗೆಷ್ಟು ಕಷ್ಟ-ನೋವು ಇತ್ತೆಂಬುದನ್ನು ಕಂಡೆ. ಅದನ್ನು ನೋಡಿದಾಗ ಸರಕಾರ ಏನು ಮಾಡುತ್ತಿದೆ? ಎಂಬ ಪ್ರಶ್ನೆ ಬರುತ್ತದೆ. ಆಳುವವರು ಏನೂ ಮಾಡಿಲ್ಲ ಎನ್ನುವುದೂ ಅರಿವಿಗೆ ಬರುತ್ತದೆ ಎಂದರು.
ಕೋವಿಡ್ʼನಿಂದ ಸಂಕಷ್ಟಕ್ಕೆ ಸಿಲುಕಿರುವ ಜನರನ್ನು ರಕ್ಷಣೆ ಮಾಡುವ ಪ್ರಾಮಾಣಿಕ ಪ್ರಯತ್ನವನ್ನೂ ಸರಕಾರ ಮಾಡಿದೆಯಾ ಎನ್ನುವ ಪ್ರಶ್ನೆಯ ಜತೆಗೆ, ಬಡತನ ಮತ್ತಷ್ಟು ಹೆಚ್ಚಾಗುತ್ತಿರುವುದಕ್ಕೆ ನಾವು ಉತ್ತರ ಕಂಡುಕೊಳ್ಳಬೇಕಿದೆ ಎಂದು ಮಾಜಿ ಮುಖ್ಯಮಂತ್ರಿಗಳು ಹೇಳಿದರು.
4.65 ಕೋಟಿ ಶ್ರಮಿಕ ವರ್ಗ ಸಂಕಷ್ಟದಲ್ಲಿ
ಕೆಲ ದಿನಗಳಿಂದ ನಾನು ಎರಡು ಮಹತ್ವದ ಕೃತಿಗಳನ್ನು ಓದುತ್ತಿದ್ದೇನೆ. ಸಮೀಕ್ಷೆಯೊಂದನ್ನು ಆಧರಿಸಿ ಒಂದು ಕೃತಿಯಲ್ಲಿ ಬರೆದಿರುವಂತೆ ಭಾರತದಲ್ಲಿ ಈಗ ಮಿಲೇನಿಯರುಗಳು, ಬಿಲೇನಿಯರುಗಳು ಹೆಚ್ಚುತ್ತಿದ್ದರೆ, ಅದಕ್ಕೆ ಪರ್ಯಾಯವಾಗಿ 4.65 ಕೋಟಿಯಷ್ಟು ಶ್ರಮಿಕ ವರ್ಗ ಬಡತನದಿಂದ ಇನ್ನೂ ದಯನೀಯ ಸ್ಥಿತಿಗೆ ಕುಗ್ಗಿ ಹೋಗಿದ್ದಾರೆಂದು ತಿಳಿಸಲಾಗಿದೆ. ಇಂಥ ಜನರ ರಕ್ಷಣೆಗೆ, ಅವರ ಜೀವ ಉಳಿಸಿಕೊಳ್ಳಲು ಸರಕಾರಗಳು ಕೈಗೊಂಡಿರುವ ಕ್ರಮಗಳ ಬಗ್ಗೆ ಗಣರಾಜ್ಯದ ಈ ದಿನ ಆತ್ಮವಿಮರ್ಶೆ ಮಾಡಿಕೊಳ್ಳಬೇಕಿದೆ ಎಂದು ಕುಮಾರಸ್ವಾಮಿ ಅವರು ಹೇಳಿದರು.
ಮತ್ತೊಂದು ಪುಸ್ತಕದಲ್ಲಿ ಸ್ಫೋಟಕ ಅಂಶವನ್ನು ಹೊರಗೆಡವಿದ್ದಾರೆ. ಬೆಂಗಳೂರಿನಂಥ ಮಹಾನಗರದ ಕಾರ್ಪೋರೇಟ್‌ ವ್ಯವಸ್ಥೆಯಲ್ಲಿರುವ ಉನ್ನತ ಮಟ್ಟದ ಉದ್ಯೋಗಿ ಗಳಿಸುವ ವಾರ್ಷಿಕ ಸಂಪಾದನೆಯನ್ನು ಗ್ರಾಮೀಣ ಪ್ರದೇಶದ ಕೂಲಿ ಕಾರ್ಮಿಕನೊಬ್ಬ ದುಡಿಯಬೇಕಾದರೆ ಕೊನೆಪಕ್ಷ 931 ವರ್ಷ ನಿರಂತರವಾಗಿ ದುಡಿಯಬೇಕು! ಹಾಗೆಯೇ; ನಮ್ಮ ದೇಶದ ಎಲ್ಲ ನ್ಯಾಯಾಲಗಳಲ್ಲಿ ಬಾಕಿ ಬಿದ್ದಿರುವ ವ್ಯಾಜ್ಯಗಳನ್ನು ವಿಲೇವಾರಿ ಮಾಡಬೇಕಾದರೆ 342 ವರ್ಷಗಳು ಬೇಕಿದೆ ಎನ್ನುವುದನ್ನು ಪುಸ್ತಕದಲ್ಲಿ ಬರೆಯಲಾಗಿದೆ. ಇದು ಇವತ್ತಿನ ದೇಶದ ವಸ್ತುಸ್ಥಿತಿ. ಇಂಥ ವ್ಯವಸ್ಥೆಯ ಬಗ್ಗೆ ಆಳುವ ಪಕ್ಷಗಳು, ಜನಪ್ರತಿನಿಧಿಗಳು ಚಿಂತನೆ ಮಾಡಬೇಕಿದೆ ಎಂದು ಕುಮಾರಸ್ವಾಮಿ ಕಿವಿಮಾತು ಹೇಳಿದರು.
ಕಾರ್ಪೋರೇಟ್‌ ಶ್ರೀಮಂತಿಕೆ
ಗಣತಂತ್ರ ಕಾರ್ಯಕ್ರಮದ ಈ ವೇದಿಕೆಯಲ್ಲಿ ನಾನು ಯಾರ ಬಗ್ಗೆಯೂ ಟೀಕೆ ಮಾಡಲು ಈ ಮಾತುಗಳನ್ನು ಹೇಳುತ್ತಿಲ್ಲ. ಆದರೆ ಕೆಲ ಸಂಗತಿಗಳನ್ನು ಹೇಳದೇ ವಿಧಿ ಇಲ್ಲ. ಹಿರಿಯರು ತಂದುಕೊಟ್ಟ ಈ ಸ್ವಾತಂತ್ರ್ಯ, ಮತ್ತು ಗಣರಾಜ್ಯದ ವ್ಯವಸ್ಥೆಯನ್ನು ಯಶಸ್ವಿಗೊಳಿಸಬೇಕು. ಆದರೆ, ನಿರೀಕ್ಷೆಗೆ ತಕ್ಕಂತೆ ಆಳಿದ ಸರಕಾರಗಳು ಈ ಕೆಲಸವನ್ನು ಮಾಡಿಲ್ಲ ಎಂದ ಅವರು, ಕಳೆದ 75 ವರ್ಷಗಳಲ್ಲಿ ಕೆಲ ಪ್ರಗತಿಗಳನ್ನು ಕಂಡಿದ್ದೇವೆ, ನಿಜ. ಆದಾಗ್ಯೂ ನಮ್ಮ ನಿಗದಿತ ಲಕ್ಷ್ಯ ಸಾಧನೆ ಇನ್ನೂ ಸಾಧ್ಯವಾಗಿಲ್ಲ ಎನ್ನುವುದನ್ನು ನಾವು ಗಮನಿಸಬೇಕಾಗಿದೆ ಎಂದು ಅವರು ಹೇಳಿದರು.
ಸಂವಿಧಾನವನ್ನು ಒಪ್ಪಿಕೊಂಡು ಜನತೆಗೆ ಮೂಲಭೂತ ಹಕ್ಕುಗಳನ್ನು ನೀಡಿದ್ದೇವೆ. ಆದರೆ ಆ ಹಕ್ಕುಗಳ ಆಶಯ ಸಾಕಾರ ಆಗಿದೆಯಾ? ಎನ್ನುವುದನ್ನು ಕೂಡ ನೋಡಬೇಕಿದೆ. ಇದಕ್ಕೆ ಚಿಕಿತ್ಸೆಯಂತೆ ಚುನಾವಣೆಗಳು ಪ್ರಾಮಾಣಿಕವಾಗಿ ನಡೆಯಬೇಕು. ಈಗ ಚುನಾವಣೆಗಳು ಪ್ರಾಮಾಣಿಕವಾಗಿ ನಡೆಯುತ್ತಿಲ್ಲ. 1952ರಿಂದ ಈವರೆಗೆ 17 ಸಾರ್ವತ್ರಿಕ ಚುನಾವಣೆಗಳು ನಡೆದಿವೆ. ರಾಜ್ಯದಲ್ಲೂ ಚುನಾವಣೆಗಳು ಆಗಿವೆ. ಚುನಾವಣೆ ಸಂದರ್ಭದಲ್ಲಿ ನೀಡುವ ಭರವಸೆಗಳು ಈಡೇರುತ್ತಿಲ್ಲ. ಕೇವಲ ಆಸೆ, ಅಮಿಷಗಳನ್ನಷ್ಟೇ ಘೋಷಣೆ ಮಾಡಲಾಗುತ್ತಿದೆ. ಬಡವರ ತೆರಿಗೆ ಹಣವನ್ನು ಪೋಲು ಮಾಡಲಾಗುತ್ತಿದೆ. ಅಂಥ ಪ್ರಯತ್ನಗಳನ್ನು ಸರಕಾರ ಪ್ರಾಮಾಣಿಕವಾಗಿ ಮಾಡುತ್ತಿಲ್ಲ. ಇಂಥ ಅಸಮರ್ಪಕ ಚುನಾವಣಾ ವ್ಯವಸ್ಥೆಗೆ ಕಾರಣವಾದ ಅಂಶಗಳನ್ನು ಸರಿಪಡಿಸದಿದ್ದರೆ ಬಡತನ ಹಾಗೆಯೇ ಉಳಿದು ಆರ್ಥಿಕತೆಯಲ್ಲಿ ಕೇವಲ ʼಕಾರ್ಪೋರೇಟ್‌ ಶ್ರೀಮಂತಿಕೆʼಯಷ್ಟೇ ನಮಗೆ ಕಾಣಲಿದೆ ಎಂದು ಮಾಜಿ ಮುಖ್ಯಮಂತ್ರಿಗಳು ಆಕ್ರೋಶ ವ್ಯಕ್ತಪಡಿಸಿದರು.
ಗಣರಾಜ್ಯ ಕಾರ್ಯಕ್ರಮದಲ್ಲಿ ವಿಧಾನ ಪರಿಷತ್‌ ಸದಸ್ಯರಾದ ಕೆ.ಎನ್‌.ತಿಪ್ಪೇಸ್ವಾಮಿ, ವಿಧಾನ ಪರಿಷತ್‌ʼನ ಮಾಜಿ ಸದಸ್ಯ ಟಿ.ಎ.ಸರವಣ, ಪಕ್ಷದ ನಗರ ಅಧ್ಯಕ್ಷ ಪ್ರಕಾಶ್‌ ಸೇರಿದಂತೆ ಅನೇಕ ಮುಖಂಡರು ಹಾಜರಿದ್ದರು.
