ಶ್ರೀರಂಗಪಟ್ಟಣದ ಬಳಿ ಭಯಾನಕ ಘಟನೆ
ಶ್ರೀರಂಗಪಟ್ಟಣ: ಚಾಲನೆ ವೇಳೆಯೇ ದಿಢೀರನೇ ದ್ವಿಚಕ್ರ ವಾಹನ ಹೊತ್ತಿ ಉರಿದ ಘಟನೆ ಮಂಡ್ಯ ಜಿಲ್ಲೆಯ ಶ್ರೀರಂಗಪಟ್ಟಣ ತಾಲೂಕಿನ ದರಸಗುಪ್ಪೆ ಬಳಿ ಇಂದು ನಡೆದಿದೆ. ವಾಹನದಲ್ಲಿ ಸಾಗುತ್ತಿದ್ದ ಇಬ್ಬರು ಸವಾರರು ಸುಟ್ಟ ಗಾಯಗಳಿಂದ ಗಂಭೀರ ಗಾಯವಾಗಿ ಗಾಯಗೊಂಡಿದ್ದಾರೆ.
ರಸ್ತೆ ಮದ್ಯೆ ಹೋಗುತ್ತಿದ್ದ ವೇಳೆ ಏಕಾಏಕಿ ಸ್ಕೂಟರ್ ಗೆ ಹೊತ್ತಿಕೊಂಡಿದ್ದು, ಏನಾಗುತ್ತಿದೆ ಎನ್ನುವಷ್ಟರಲ್ಲಿ ಬೆಂಕಿ ಜ್ವಾಲೆ ಭುಗಿಲೆದ್ದು ಇಬ್ಬರೂ ತೀವ್ರವಾಗಿ ಗಾಯಗೊಂಡಿದ್ದಾರೆ. ಅವರನ್ನು ಸಮೀಪದ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ.
ಬೆಂಕಿಯ ಕೆನ್ನಾಲಿಗೆಗೆ ಸಿಕ್ಕಿದ ಇಬ್ಬರನ್ನು ದಾರಿಯಲ್ಲಿ ಹಾದುಹೋಗುತ್ತಿದ್ದವರು ಧಾವಿಸಿ ರಕ್ಷಣೆ ಮಾಡಿದ್ದಾರೆ. ಫುಲ್‌ ಟ್ಯಾಂಕ್‌ ಮಾಡಿಸಿದ್ದ ಟ್ಯಾಂಕ್‌ ನಲ್ಲಿ ಪೆಟ್ರೋಲ್‌ ಚೆಲ್ಲಿ ಈ ದುರ್ಘಟನೆ ಸಂಭವಿಸಿರಬಹುದು ಎಂದು ಹೇಳಲಾಗಿದೆ. ಆದರೆ, ತನಿಖೆಯ ಪೂರ್ಣ ಮಾಹಿತಿ ಸಿಗಬೇಕಿದೆ.
ದ್ವಿಚಕ್ರ ವಾಹನ ಸವಾರರು ಆದಷ್ಟು ತಮ್ಮ ವಾಹನಗಳಿಗೆ ಇಂಧನ ಭರ್ತಿ ಮಾಡಿಸುವಾಗ ಫುಲ್‌ ಟ್ಯಾಂಕ್‌ ಮಾಡಿಸಬಾರದು ಎಂದು ವಾಹನ ತಜ್ಞರು ಸಲಹೆ ಮಾಡಿದ್ದಾರೆ.
ಶಿವರಾಮ (73), ಅನಂತರಾಮಯ್ಯ (50) ಗಾಯಗೊಂಡವರು. ಇವರಿಬ್ಬರೂ ಮೈಸೂರು ನಿವಾಸಿಗಳು. ಶ್ರೀರಂಗಪಟ್ಟಣ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
