ಬೆಂಗಳೂರಿನಲ್ಲಿ 43.13% ಮತದಾರರ ಪ್ರಮಾಣ ಕುಸಿತ
ಬೆಂಗಳೂರು: ರಾಜ್ಯದಲ್ಲಿ ನಡೆಸಿದ ಮತದಾರರಪಟ್ಟಿ ವಿಶೇಷ ಸಮಗ್ರ ಪರಿಷ್ಕರಣೆ (ಎಸ್ಐಆರ್) ಪ್ರಕ್ರಿಯೆ ಮುಕ್ತಾಯಗೊಂಡಿದ್ದು, 99.32 ಲಕ್ಷ ಮತದಾರರ ಹೆಸರುಗಳನ್ನು ಕೈಬಿಡಲಾಗಿದೆ.
ಎಸ್‌ಐಆರ್‌ಗೂ ಮುನ್ನ ರಾಜ್ಯದಲ್ಲಿ ನೋಂದಾಯಿಸಲಾದ 5,54,32,314 ಮತದಾರರ ಪೈಕಿ ಸುಮಾರು ಕರ್ನಾಟಕದ ಅಂತಿಮ ಮತದಾರರ ಪಟ್ಟಿಯಲ್ಲಿ 4,55,00,011 ಮತದಾರರಿದ್ದಾರೆ.
ಹಾಗೆಯೇ, ಚುನಾವಣಾ ಆಯೋಗ ರಾಜ್ಯದಲ್ಲಿ ನಡೆಸಿದ ವಿಶೇಷ ತೀವ್ರ ಮತದಾರರ ಪಟ್ಟಿ ಪರಿಷ್ಕರಣೆ ಬೆಂಗಳೂರಿನ ಚಿತ್ರಣವನ್ನೇ ಬದಲಿಸಿದ್ದು, ರಾಜಧಾನಿಯ ಮತದಾರರ ಸಂಖ್ಯೆಯಲ್ಲಿ ಭಾರಿ ಇಳಿಕೆಯಾಗಿದೆ.
ಎಸ್ಐಆರ್ ಆರಂಭಕ್ಕೂ ಮುನ್ನ 1.03 ಕೋಟಿಯಷ್ಟಿದ್ದ ಬೆಂಗಳೂರಿನ ಮತದಾರರ ಸಂಖ್ಯೆ, ಅಕ್ಟೋಬರ್‌ 27ರಂದು ಪ್ರಕಟವಾದ ಅಂತಿಮ ಮತದಾರರ ಪಟ್ಟಿಯಲ್ಲಿ 59.08 ಲಕ್ಷಕ್ಕೆ ಇಳಿಕೆಯಾಗಿದೆ. ಅಂದರೆ, ಮತದಾರರ ಸಂಖ್ಯೆಯಲ್ಲಿ ಬರೊಬ್ಬರಿ ಶೇ.43.13ರಷ್ಟು ಕುಸಿತವಾಗಿದೆ.
ಅಂತಿಮ ಮತದಾರರ ಪಟ್ಟಿ
ಅಂತಿಮ ಮತದಾರರ ಪಟ್ಟಿಯಲ್ಲಿ 2.25 ಕೋಟಿಗೂ ಹೆಚ್ಚು ಪುರುಷರು, 2.29 ಕೋಟಿ ಮಹಿಳೆಯರು ಮತ್ತು 2,841 ತೃತೀಯ ಲಿಂಗ ಮತದಾರರಿದ್ದಾರೆ.
ಅಂಕಿ-ಅಂಶಗಳ ಪ್ರಕಾರ ಎಸ್ಐಆರ್ ವೇಳೆ ಗೈರಾದವರು 19,00,926, ಶಾಶ್ವತವಾಗಿ ಬೇರೆಡೆಗೆ ಸ್ಥಳಾಂತರಗೊಂಡವರು 65,45,679, ಮೃತಪಟ್ಟವರು 16,39,864, ನಕಲಿ 7,09,870 ಮತದಾರರ ಹೆಸರುಗಳನ್ನು ಪಟ್ಟಿಯಿಂದ ಕೈಬಿಡಲಾಗಿದೆ. ಸುಮಾರು 7 ಲಕ್ಷಕ್ಕೂ ಅಧಿಕ ನಕಲಿ ಅಥವಾ ಎರಡು ಕಡೆಗಳಲ್ಲಿ ಹೆಸರು ಹೊಂದಿದ್ದ ಮತದಾರರ ಹೆಸರುಗಳನ್ನು ರದ್ದುಗೊಳಿಸಲಾಗಿದೆ.
ವಾಸ ಇಲ್ಲದವರು
ಪರಿಷ್ಕರಣೆ ಸಮಯದಲ್ಲಿ ಸುಮಾರು 80 ಲಕ್ಷಕ್ಕೂ ಅಧಿಕ ಜನರು ತಾವು ನಮೂದಿಸಿದ ವಿಳಾಸದಲ್ಲಿ ವಾಸ ಇಲ್ಲದಿರುವುದು ಅಥವಾ ಮನೆ ಬದಲಾಯಿಸಿರುವುದು ಎಸ್ಐಆರ್ ಸಮಯದಲ್ಲಿ ಪತ್ತೆ ಆಗಿದೆ.ಈ ಪ್ರಕ್ರಿಯೆಯಲ್ಲಿ 16.39 ಲಕ್ಷ ಮೃತರ ಹೆಸರನ್ನು ಮತದಾರರ ಪಟ್ಟಿಯಿಂದ ಕೈಬಿಡಲಾಗಿದೆ ಎಂದು ರಾಜ್ಯ ಮುಖ್ಯಚುನಾವಣಾ ಅಧಿಕಾರಿ ತಿಳಿಸಿದ್ದಾರೆ.
ಒಂದು ವೇಳೆ ಮತದಾರರ ಪಟ್ಟಿಯಿಂದ ಹೆಸರು ಬಿಟ್ಟು ಹೋಗಿದ್ದರೆ, ಅಂತಹವರು ಆತಂಕಪಡುವ ಅಗತ್ಯವಿಲ್ಲ, ಅಂತಹವರ ಮರುಸೇರ್ಪಡೆಗೆ ಅವಕಾಶ ಕಲ್ಪಿಸಲಾಗಿದೆ.
ಅರ್ಹ ಮತದಾರರ ಸೇರ್ಪಡೆ
ಇದರ ನಡುವೆ ಮತದಾರರ ಪಟ್ಟಿಗೆ ಸೇರ್ಪಡೆ ಕಾರ್ಯ ನಿರಂತರವಾಗಿ ನಡೆಯುತ್ತಿರುತ್ತದೆ, ಅರ್ಹ ಮತದಾರರು ಅಗತ್ಯ ದಾಖಲೆಗಳೊಂದಿಗೆ ಪಟ್ಟಿಗೆ ಸೇರ್ಪಡೆ ಆಗಬಹುದಾಗಿದೆ ಎಂದು ಚುನಾವಣಾ ಆಯೋಗ ತಿಳಿಸಿದೆ.
ಹೊಸದಾಗಿ ಸೇರ್ಪಡೆ ಮಾಡುವವರು ಫಾರಂ-6 ಭರ್ತಿ ಮಾಡಬೇಕು, ನಂತರ ಆಯೋಗದ ವೆಬ್‌ಸೈಟ್‌ ಅಥವಾ ವೋಟರ್‌ ಸಹಾಯವಾಣಿ ಆಪ್‌ ಮೂಲಕ ಲಾಗ್‌ಇನ್‌ ಆಗಿ, ಆಧಾರ್‌ ಕಾರ್ಡ್‌, ವಾಸ ಸ್ಥಳದ ದಾಖಲೆ ಮತ್ತು ಭಾವಚಿತ್ರ ಅಪ್‌ಲೋಡ್‌ ಮಾಡಿ ಆನ್‌ಲೈನ್‌ ಅರ್ಜಿ ಸಲ್ಲಿಸಬಹುದಾಗಿದೆ.ಇದಲ್ಲದೆ, ಬೂತ್‌ ಮಟ್ಟದ ಅಧಿಕಾರಿ ಅಥವಾ ತಹಸೀಲ್ದಾರ್‌ ಅವರನ್ನು ಸಂಪರ್ಕಿಸಿ ಸ್ಥಳೀಯವಾಗಿಯೇ ಅರ್ಜಿ ಸಲ್ಲಿಸಲು ಅವಕಾಶ ಇದೆ ಎಂದು ಆಯೋಗ ತಿಳಿಸಿದೆ.
ಅಂತಿಮ ಮತದಾರರ ಪಟ್ಟಿಯ ಪ್ರಕಾರ ಬೆಂಗಳೂರು ನಗರ ವ್ಯಾಪ್ತಿಯ ವಿವಿಧ ಆಡಳಿತ ಘಟಕಗಳಲ್ಲಿರುವ ಮತದಾರರ ವಿವರ ಹೀಗಿದೆ. ಬೆಂಗಳೂರು ನಗರ: 24.01 ಲಕ್ಷ, ಬಿಬಿಎಂಪಿ ಉತ್ತರ: 13.25 ಲಕ್ಷ, ಬಿಬಿಎಂಪಿ ದಕ್ಷಿಣ: 11.13 ಲಕ್ಷ, ಬಿಬಿಎಂಪಿ ಕೇಂದ್ರ: 10.67 ಲಕ್ಷ, ಬೆಂಗಳೂರು ಗ್ರಾಮಾಂತರ: 8.04 ಲಕ್ಷ ಮತದಾರರು ಇದ್ದಾರೆ.
