ಹೈದರಾಬಾದ್: ಕನ್ನಡದ ಕಿಚ್ಚ ಸುದೀಪ್ ಅವರು ಸೋಮವಾರ ಇಲ್ಲಿ ಟಾಲಿವುಡ್‌ ಪವರ್‌ʼಸ್ಟಾರ್‌ ಹಾಗೂ ಜನಸೇನಾ ಪಕ್ಷದ ಅಧ್ಯಕ್ಷ ಪವನ್ ಕಲ್ಯಾಣ್‌ ಅವರನ್ನು ಭೇಟಿ ಮಾಡಿ ಮಾತುಕತೆ ನಡೆಸಿದ್ದಾರೆ. ಈ ಭೇಟಿ ಹೈದರಾಬಾದ್‌ನ ಜನಸೇನಾ ಪಕ್ಷದ ಕಚೇರಿಯಲ್ಲಿ ನಡೆದಿದೆ.
ಈಗಾಗಲೇ ʼಈಗʼ, ʼಬಾಹುಬಲಿʼ ಹಾಗೂ ʼಸೈರಾ ನರಸಿಂಹ ರೆಡ್ಡಿʼ ಚಿತ್ರಗಳಲ್ಲಿ ನಟಿಸಿ ತೆಲುಗು ಪ್ರೇಕ್ಷಕರಿಗೂ ಚಿರಪರಿಚಿತರಾಗಿರುವ ಸುದೀಪ್ ಅವರು, ಪವನ್ ಕಲ್ಯಾಣ್‌ ಅವರನ್ನು ಭೇಟಿಯಾದ ಸುದ್ದಿ ಟಾಲಿವುಡ್‌ವಲ್ಲಿ ಮಿಂಚಿನ ಸಂಚಾರ ಉಂಟು ಮಾಡಿದೆ.
ಕೋವಿಡ್ ಕಾರಣದಿಂದ ಭಾರತೀಯ ಚಿತ್ರರಂಗ ಎದುರಿಸುತ್ತಿರುವ ಬಿಕ್ಕಟ್ಟುಗಳು, ಲಾಕ್‌ಡೌನ್‌ನಿಂದ ಉಂಟಾದ ಪರಿಣಾಮಗಳು, ಅನ್‌ಲಾಕ್‌ನತ್ತ ಹೊರಟಿರುವ ಸಿನಿಮಾ ಚಟುವಟಿಕೆಗಳು, ಶೂಟಿಂಗ್‌ ಮೇಲೆ ವಿಧಿಸಿರುವ ನಿರ್ಬಂಧಗಳು ಸೇರಿದಂತೆ ಹತ್ತುಹಲವು ಅಂಶಗಳ ಬಗ್ಗೆ ಇಬ್ಬರು ಸ್ಟಾರ್‌ಗಳು ಸಾಷ್ಟು ಹೊತ್ತು ಚರ್ಚೆ ನಡೆಸಿದ್ದಾರೆ. ಅತ್ಯಂತ ಆತ್ಮೀಯತೆಯಿಂದ ನಡೆದ ಈ ಬೇಟಿಯ ವೇಳೆ ಸುದೀಪ್ ಅವರು ಪವನ್ ಕಲ್ಯಾಣ್‌ ಅವರಿಗೆ ಗಿಡವನ್ನು ಉಡುಗೊರೆಯಾಗಿ ನೀಡಿದರು. “ನಿಮ್ಮನ್ನು ಭೇಟಿಯಾಗಿದ್ದು ತುಂಬಾ ಸಂತೋಷ ಉಂಟು ಮಾಡಿದೆ” ಎಂದು ಪವನ್, ಸುದೀಪ್ ಅವರಿಗೆ ಹೇಳಿದ್ದಾರೆ.
ಒಂದು ಗಂಟೆಗೂ ಹೆಚ್ಚು ಹೊತ್ತು ನಡೆದ ಈ ಭೇಟಿಯ ವೇಳೆ, “ಯಾವ ಚಿತ್ರಗಳಲ್ಲಿ ನಟಿಸುತ್ತಿದ್ದೀರಿ” ಎಂದು ಸುದೀಪ್ ಅವರನ್ನು ಕೇಳಿ ತಿಳಿದುಕೊಂಡರು ಪವನ್. ಶೂಟಿಂಗ್‌ ಮೇಲೆ ನಿರ್ಬಂಧ ತೆರವು ಮಾಡಿದ ಮೇಲೆ ಶೂಟಿಂಗ್‌ನಲ್ಲಿ ಪಾಲ್ಗೊಳ್ಳುತ್ತಿರುವುದಾಗಿ ಕಿಚ್ಚ ಹೇಳಿದರೆಂದು ಮೂಲಗಳು ತಿಳಿಸಿವೆ.
ಕಳೆದ ವರ್ಷ ಸುದೀಪ್ ಅವರು ಸಲ್ಮಾನ್‌ ಖಾನ್‌ ನಟನೆಯ ʼದಬಾಂಗ್‌ 3ʼ ಚಿತ್ರದಲ್ಲಿ ವಿಲನ್‌ ರೋಲ್‌ ಮಾಡಿದ್ದರು. ಇನ್ನು ಪವನ್ ಕಲ್ಯಾಣ್‌ ಅವರು ʼಷಕೀಲ್‌ ಸಾಬ್‌ʼ ಎಂಬ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಜತೆಗೆ, ಕ್ರಿಷ್‌ ಜಾಗರ್ಲಮುಡಿ ನಿರ್ದೇಶನದ ಪಿರಿಯಾಡಿಕ್‌ ಕಥೆಯುಳ್ಳ ಚಿತ್ರವೊಂದರಲ್ಲಿ ನಟಿಸಲಿದ್ದಾರೆ. ಇವೆಲ್ಲ ಅಂಶಗಳ ಬಗ್ಗೆಯು ಇಬ್ಬರು ಸ್ಟಾರ್‌ಗಳು ಚರ್ಚೆ ಮಾಡಿದರು ಎಂದು ಜನಸೇನಾ ಮೂಲಗಳು ತಿಳಿಸಿವೆ.
ಪವನ್ ಕಲ್ಯಾಣ್‌ ಅವರನ್ನು ಭೇಟಿಯಾದ ವಿಷಯವನ್ನು ಸ್ವತಃ ಸುದೀಪ್ ಅವರೇ ಟ್ವಿಟರ್‌ನಲ್ಲಿ ತಿಳಿಸಿದ್ದಾರೆ. ಹಾಗೆಯೇ ಜನಸೇನಾ ಪಕ್ಷವೂ ಈ ವಿಷಯವನ್ನು ಜಾಲತಾಣಗಳ ಮೂಲಕ ತಿಳಿಸಿದೆ.
Expecting any movie together….!!!!!!!???