ಶಿಡ್ಲಘಟ್ಟ ತಾಳೂಕಿನ ಬಶೆಟ್ಟಹಳ್ಳಿ, ದೊಡ್ಡಹಳ್ಳಿ ಪಂಚಾಯತಿ ವ್ಯಾಪ್ತಿಯಲ್ಲಿ ರಕ್ಕಸರೂಪಿ ಬಿರುಗಾಳಿ ಮಿಶ್ರಿತ ಆಲಿಕಲ್ಲು ಮಳೆಗೆ ಪಾಲಿಹೌಸ್ಗಳು ಹಾರಿ ಹೋದವು. ಅದರೊಳಗಡೆಯಿದ್ದ ಕ್ಯಾಪ್ಸಿಕಂ ಸೇರಿದಂತೆ ನಾನಾ ಬಗೆಯ ತರಕಾರಿ-ಹೂವು ಕೊಚ್ಚಿಕೊಂಡು ಹೋದವು. ದ್ರಾಕ್ಷಿ ಚಪ್ಪರಗಳು ನೆಲಕ್ಕುರುಳಿದವು.
ಚಿಕ್ಕಬಳ್ಳಾಪುರ: ಕೋವಿಡ್ಗೆ ಒದ್ದಾಡುತ್ತಿದ್ದ ಜನರಿಗೆ ಗುರುವಾರ ಸುರಿದ ಭಾರೀ ಗಾಳಿ ಮಿಶ್ರಿತ ಆಲಿಕಲ್ಲು ಮಳೆ ರೈತನಿಗೆ ಕಣ್ಣೀರು ಹಾಕುವಂತೆ ಮಾಡಿದೆ.
ಮಧ್ಯಾಹ್ನದ ನಂತರ ಚಿಕ್ಕಬಳ್ಳಾಪುರ, ಶಿಡ್ಲಘಟ್ಟ, ಬಾಗೇಪಲ್ಲಿ ಸೇರಿದಂತೆ ಜಿಲ್ಲೆಯ ವಿವಿಧ ಭಾಗಗಳಲ್ಲಿ ಸುರಿದ ಆಲಿಕಲ್ಲು ಮಳೆ ಜನರನ್ನು ಬೆಚ್ಚಿಬೀಳುವಂತೆ ಮಾಡಿತು. ಸೈಜುಗಲ್ಲುಗಳಂತೆ ಆಕಾಶದಿಂದ ಬೀಳುತ್ತಿದ್ದ ಆಲಿಕಲ್ಲುಗಳನ್ನು ಕಂಡು ಆವಾಕ್ಕಾದರು.
ಶಿಡ್ಲಘಟ್ಟದಲ್ಲಿ ಬಿರುಗಾಳಿ ಸಮೇತ ಆಲಿಕಲ್ಲು ಮಳೆಯಾಗಿದ್ದು, ದ್ರಾಕ್ಷಿ ಚಪ್ಪರಗಳೆಲ್ಲ ನೆಲಕ್ಕುರಳಿವೆ. ಪಾಲಿಹೌಸ್ಗಳು ಮಕಾಡೆ ಮಲಗಿವೆ. ಕೋಟ್ಯಂತರ ರೂಪಾಯಿ ನಷ್ಟವಾಗಿದ್ದು ರೈತರು ಕಂಗಾಲಾಗಿದ್ದಾರೆ.
ಆಕಾಶವೇ ಬಿರುಕು ಬಿಟ್ಟಂತೆ ಸುರಿದ ಧಾರಾಕಾರ ಮಳೆಗೆ ಬಿರುಗಾಲೀ ಕೂಡ ಸೇರಿಕೊಂಡು ಸಂಜೆ ಹೊತ್ತಿಗೆ ಎಲ್ಲೆಡೆ ಮಳೆಯು ಪ್ರಳಯ ಸೃಷ್ಟಿ ಮಾಡಿತ್ತು. ಗಂಟೆಗೂ ಹೆಚ್ಚು ಕಾಲ ಬಿರುಗಾಳಿ ಸಮೇತ ಗುಡುಗು, ಮಿಂಚಿನೊಂದಿಗೆ ಭಾರಿ ಮಳೆ ಸುರಿದು ಕೆರೆಕಟ್ಟೆಗಳಿಗೆ ನೀರು ಹರಿದು ಬಂದಿದೆ.
ಆದರೆ, ಮಳೆಯ ರಭಸಕ್ಕೆ ಬಹುತೇಕ ಜಿಲ್ಲೆಯ ಎಲ್ಲಡೆ ಕೃಷಿ ಬೆಲೆಗಳು ಸರ್ವನಾಶವಾಗಿವೆ. ಬಾಗೇಪಲ್ಲಿ ತಾಲ್ಲೂಕಿನ ಗೂಳೂರು, ಪಾತಪಾಳ್ಯ ಸೇರಿದಂತೆ ತಾಲೂಕಿನಾದ್ಯಂತ ಗುಡುಗು ಸಿಡಿಲಿನೊಂದಿಗೆ ಆರ್ಭಟಿಸಿದ ವರುಣ ಬಿಸಿಲಿನಿಂದ ಕಂಗೆಟ್ಟಿದ್ದ ಭೂಮಿಗೆ ತಂಪರೆದ. ಏಕಾಏಕಿ ಮಳೆರಾಯನ ಅಬ್ಬರಕ್ಕೆ ಜನತೆ ಕಂಗಾಲಾಗಿದ್ದರು. ಮುಂಜಾಗ್ರತಾ ಕ್ರಮವಾಗಿ ವಿದ್ಯುತ್ ಸಂಪರ್ಕ ಕಡಿತ ಮಾಡಲಾಗಿತ್ತು. ಮುಂಗಾರು ಬಿತ್ತನೆಗೆ ಭೂಮಿ ಹದ ಮಾಡುತ್ತಿರುವ ರೈತರಿಗೆ ಈ ಮಳೆ ಅನುಕೂಲವಾಗಿದೆ. ಅದ್ದರಿಂದ ರೈತರ ಮೊಗದಲ್ಲಿ ಮಂದಹಾಸ ಬೀರಿದ್ದಾರೆ. ಆದರೆ, ನೀರಾವರಿ ಬೆಳೆಗಳನ್ನಿಟ್ಟದ್ದ ರೈತರು ತೀವ್ರ ಆಘಾತಕ್ಕೊಳಗಾಗಿದ್ದಾರೆ.
ಶಿಡ್ಲಘಟ್ಟದಲ್ಲಿ ಬಿರುಗಾಳಿ ಸಮೇತ ಆಲಿಕಲ್ಲು ಮಳೆ
ಚಿಕ್ಕಬಳ್ಳಾಪುರದಲ್ಲೂ ಮಳೆ ಬಿದ್ದಿತಾದರೂ ಪಕ್ಕದ ಶಿಡ್ಲಘಟ್ಟ ತಾಲ್ಲೂಕಿನಲ್ಲಿ ಮಳೆ ಭೀಭತ್ಸ ಸೃಷ್ಟಿ ಮಾಡಿದೆ. ಕೆಲವೆಡೆ ಅಬ್ಬರದ, ಜೋರು ಮಳೆಯಾಯಿತಾದರೂ, ಬಶೆಟ್ಟಹಳ್ಳಿ ಹೋಬಳಿ, ದೊಡ್ಡಹಳ್ಳಿ ಪಂಚಾಯತಿ ವ್ಯಾಪ್ತಿಯಲ್ಲಿ ಮಾತ್ರ ಸುರಿದ ರಕ್ಕಸರೂಪಿ ಬಿರುಗಾಳಿ ಮಿಶ್ರಿತ ಆಲಿಕಲ್ಲು ಮಳೆಗೆ ಪಾಲಿಹೌಸ್ಗಳು ಹಾರಿ ಹೋದವು. ಪೌಲಿಹೌಸ್ಗಳ ಹೊದಿಕೆ ಹರಿದು ಹಂಚಿ ಅದರೊಳಗಡೆಯಿದ್ದ ಕ್ಯಾಪ್ಸಿಕಂ ಸೇರಿದಂತೆ ನಾನಾ ಬಗೆಯ ತರಕಾರಿ ಹೂವುಗಳು ಕೊಚ್ಚಿಕೊಂಡು ಹೋದವು. ದ್ರಾಕ್ಷಿ ಚಪ್ಪರಗಳು ನೆಲಕ್ಕುರುಳಿದವು. ಈ ಬೆಳೆಗಳ ನಷ್ಟದಿಂದ ಕೋಟ್ಯಂತರ ರೂಪಾಯಿ ನಷ್ಟವುಂಟಾಗಿರಬಹುದು ಎಂದು ಅಂದಾಜು ಮಾಡಲಾಗಿದೆ.
ಸುಮಾರು ಅರ್ಧಗಂಟೆ ಸುರಿದ ಈ ಬಿರುಗಾಳಿ ಆಲಿಕಲ್ಲು ಮಳೆಗೆ ಬಶೆಟ್ಟಹಳ್ಳಿ ಸುತ್ತಮುತ್ತ ಸುಮಾರು 30ಕ್ಕೂ ಹೆಚ್ಚು ಪಾಲಿಹೌಸ್ಗಳು, ನಾಲ್ಕು ದ್ರಾಕ್ಷಿ ತೋಟಗಳು, ನೂರಾರು ರೈತರ ತೋಟದಲ್ಲಿನ ನಾನಾ ತರಕಾರಿ ಹೂವು, ಹಿಪ್ಪುನೇರಳೆ ದನಕರುಗಳ ಮೇವು ಕೊಚ್ಚಿಹೋಗಿದೆ.
ಸುಮಾರು 5ರಿಂದ 6 ಕೆಜಿ ತೂಕದ ಸೈಜುಗಲ್ಲುಗಳ ರೀತಿಯ ಆಲಿಕಲ್ಲುಗಳು ಜೀವಹಾನಿ ಆಗಿರುವ ಬಗ್ಗೆ ವರದಿಗಳಿಲ್ಲ. ಆದರೆ, ಜನರಂತೂ ಆ ಆಲಿಕಲ್ಲುಗಳನ್ನು ಕಂಡು ಹೌಹಾರಿದರು. ಮಳೆ ನಿಂತ ಮೇಲೆ ತೋಟಗಳತ್ತ ಓಡಿಬಂದ ರೈತರು ಬೆಳೆ ನೆಲದ ಪಾಲಾಗಿದ್ದನ್ನು ಕಂಡು ದಿಗ್ಭ್ರಮೆಗೊಂಡರು.
ಬಹುತೇಕ ದಾಕ್ಷಿ ಚಪ್ಪರಗಳಲ್ಲಿ ಫಸಲು ಕೈಗೆ ಬರುವುದರಲ್ಲಿತ್ತು. ಪಾಲಿಹೌಸ್ಗಳಿಗೆ ಲಕ್ಷಾಂತರ ರೂಪಾಯಿ ಬಂಡವಾಳ ಹೂಡಿದ್ದ ರೈತರು ತಲೆ ಮೇಲೆ ಕೈಯೊತ್ತು ಕೂತರು. ಕೆಲ ರೈತರು ಮಾತ್ರ ಬೆಳೆ ವಿಮೆ ಮಾಡಿಸಿದ್ದು, ಬಹುತೇಕರು ಮಾಡಿಸಿಲ್ಲ.
ಬೆಳೆ ನಷ್ಟವನ್ನು ಕಂಡು ಕಣ್ಣೀರು ಹಾಕಿದ ರೈತರು ದಿಕ್ಕುತೋಚದಾಗಿದ್ದರು. ಜಿಲ್ಲಾಧಿಕಾರಿ ಸೇರಿದಂತೆ ಕೃಷಿ ಇಲಾಖೆ ಹಾಗೂ ವಿಪತ್ತು ನಿರ್ವಹಣಾ ಅಧಿಕಾರಿಗಳು ಶುಕ್ರವಾರವೇ ಸ್ಥಳಕ್ಕೆ ಭೇಟಿ ನೀಡಿ ನಷ್ಟದ ಅಂದಾಜು ಮಾಡಬೇಕು, ಶೀಘ್ರವೇ ಸರಕಾರದಿಂದ ನಷ್ಟ ಪರಿಹಾರ ಕೊಡಿಸಬೇಕು ಎಂದು ರೈತರು ಒತ್ತಾಯ ಮಾಡಿದರು.
