ವೊಲೊಡಿಮಿರ್ ಝೆಲೆನ್ಸ್ಕಿ ನಟರಾಗಿದ್ದ ವೇಳೆ ಕಾಮಿಡಿ ಶೋ
ಕಿವ್: ರಷ್ಯಾ ಸೃನಾಪಡೆಗಳ ವಿರುದ್ಧ ವಿರೋಚಿತವಾಗಿ ಹೋರಾಟ ನಡೆಸುತ್ತಿರುವ ಉಕ್ರೇನ್ ದೇಶ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಅವರು ಅಧ್ಯಕ್ಷ ಪದವಿಗೇರುವ ಮುನ್ನ ಸಿನಿಮಾ ಹಾಸ್ಯನಟರಾಗಿದ್ದರು. ಅಲ್ಲದೆ; ಅತ್ಯುತ್ತಮ ಡಾನ್ಸರ್ ಕೂಡ ಆಗಿದ್ದರು. ಈಗ ಅವರ ಹಳೆಯ ಸಿನಿಮಾಗಳು ಹಾಗೂ ಡಾನ್ಸ್ ವಿಡಿಯೋಗಳು ಜಾಲತಾಣಗಳಲ್ಲಿ ವೈರಲ್ ಆಗಿವೆ.
ವೊಲೊಡಿಮಿರ್ ಝೆಲೆನ್ಸ್ಕಿ ವಿರೋಚಿತವಾಗಿ ಯುದ್ಧಭೂಮಿಯಲ್ಲೇ ತಮ್ಮ ಸೈನಿಕರ ಜತೆ ಇದ್ದಾರೆ. ದೇಶದಿಂದ ಸುರಕ್ಷಿತವಾಗಿ ಪಾರಾಗಿ ಬನ್ನಿ, ನಿಮಗೆ ನೆರವು ನೀಡುತ್ತೇವೆ ಎಂದು ಅಮೆರಿಕ ನೀಡಿದ ಆಫರ್ ಅನ್ನು ತಿರಸ್ಕರಿಸಿರುವ ಅವರು, ನಾನು ತಾಯ್ನಾಡಿಗಾಗಿ ಸಾಯಲು ಸಿದ್ಧ. ಆದರೆ, ನನ್ನ ಜನರನ್ನು ಬಿಟ್ಟು ಹೇಡಿಯಂತೆ ಓಡಿ ಹೋಗಲಾರೆ ಎಂದಿದ್ದರು.
ಕಳೆದ ನಾಲ್ಕು ದಿನಗಳಿಂದ ಅವರು ಸೇನಾ ಸಮವಸ್ತ್ರ ಧರಿಸಿ, ಕೈಯ್ಯಲ್ಲಿ ಆಯುಧವನ್ನಿಡಿದು ಸೇನೆಯ ಜತೆಯಲ್ಲೇ ಇದ್ದಾರೆ. ಅಲ್ಲದೆ ಜಾಲತಾಣಗಳ ಮೂಲಕ ಜನರಲ್ಲಿ ಧೈರ್ಯ ತುಂಬುತ್ತಿದ್ದಾರೆ. ಈ ಕಾರಣಕ್ಕಾಗಿ ವೊಲೊಡಿಮಿರ್ ಝೆಲೆನ್ಸ್ಕಿ ಈಗ ಇಡೀ ಜಗತ್ತಿನಲ್ಲಿ ಎಲ್ಲರ ಕುತೂಹಲ ಕೆರಳಿಸಿದ್ದಾರೆ. ಅವರ ಅಭಿಮಾನಿಗಳು ಹೆಚ್ಚುತ್ತಿದ್ದಾರೆ.
ಈ ನಡುವೆ ಅವರು ಸಿನಿಮಾ ನಟರಾಗಿದ್ದಾಗ ನಟಿಸಿದ್ದ ಚಿತ್ರಗಳು ಹೆಚ್ಚು ಟ್ರೆಂಡಿಂಗ್ ನಲ್ಲಿವೆ. ಅವರ ಸ್ಟ್ಯಾಂಡಪ್ ಕಾಮಿಡಿ ಶೋಗಳು, ಡಾನ್ಸ್ʼಗಳು ಯುಟ್ಯೂಬ್ ಮತ್ತಿತರೆ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿವೆ. ಚಿಕ್ಕಮಕ್ಕಳೂ ಅವರ ಅಭಿಮಾನಿಗಳಾಗುತ್ತಿದ್ದಾರೆ. ೨೦೦೬ರಲ್ಲಿ ಅವರು ನೃತ್ಯ ಕಲಾವಿದೆಯರ ಜತೆ ಹೆಜ್ಜೆ ಹಾಕಿದ್ದ ವಿಡಿಯೋಗಳು ಭಾರೀ ಮೆಚ್ಚುಗೆಗೆ ಪಾತ್ರವಾಗಿವೆ.
2009ರಿಂದ ನಟನೆಯಲ್ಲಿ ತೊಡಗಿದ್ದ ವೊಲೊಡಿಮಿರ್ ಝೆಲೆನ್ಸ್ಕಿ ʼಲವ್ ಇನ್ ದಿ ಬಿಗ್ ಸಿಟಿʼ ಸಿನಿಮಾ ಮೂಲಕ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ್ದರು. ಆಮೇಲೆ 2018ರಲ್ಲಿ ಬಂದ ʼಐ,ಯು,ಇ,ಶೀʼ ಅವರ ಕೊನೆಯ ಚಿತ್ರ. ಇದಲ್ಲದೆ ಮೂರು ಟೀವಿ ಧಾರಾವಾಹಿಗಳಲ್ಲೂ ಅವರು ನಟಿಸಿದ್ದಾರೆ.
2019ರಲ್ಲಿ ನಡೆದ ಉಕ್ರೇನ್ ಅಧ್ಯಕ್ಷೀಯ ಚುನಾವಣೆಯಲ್ಲಿ ಅವರು ಭಾರೀ ಬಹುಮತದಿಂದ ದೇಶದ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದರು. ಚುನಾವಣೆಗೆ ಕೇವಲ ಆರು ತಿಂಗಳು ಇದೆ ಎನ್ನುವಾಗ ಅವರು ಅಧ್ಯಕ್ಷೀಯ ಚುನಾವಣೆಗೆ ಅಭ್ಯರ್ಥಿ ಆಗುವುದಾಗಿ ಪ್ರಕಟಿಸಿದ್ದರು. ಯುಟ್ಯೂಬ್ ಮತ್ತು ಸಾಮಾಜಿಕ ತಾಣಗಳನ್ನು ತಮ್ಮ ಚುನಾವಣಾ ಪ್ರಚಾರಕ್ಕೆ ಭರ್ಜರಿಯಾಗಿ ಬಳಸಿಕೊಂಡ ಅವರು, ಚುನಾವಣೆಯಲ್ಲಿ ಭರ್ಜರಿ ಗೆಲುವು ಸಾಧಿಸಿದ್ದರು. ೪೪ ವರ್ಷಷದ ವೊಲೊಡಿಮಿರ್ ಝೆಲೆನ್ಸ್ಕಿ ಈಗ ಎಲ್ಲರಿಗೂ ಹೀರೋ ಆಗಿ ಹೊರಹೊಮ್ಮಿದ್ದಾರೆ.
