ರಾಜ್ಯಾಧ್ಯಕ್ಷರಾಗಲು ಶೋಭಾ ಕರಂದ್ಲಾಜೆ ಹಿಂದೇಟು; ಬಿಜೆಪಿ ನೂತನ ರಾಜ್ಯಾಧ್ಯಕ್ಷರಾಗಿ ವಿ.ಸೋಮಣ್ಣ

ಬಸನಗೌಡ ಪಾಟೀಲ್ ಯತ್ನಾಳ್ ಹೆಸರೂ ಮುಂಚೂಣಿಗೆ

ಬೆಂಗಳೂರು: ಲೋಕಸಭೆ ಚುನಾವಣೆಯಲ್ಲಿ ರಾಜ್ಯದಲ್ಲಿ ಕಾಂಗ್ರೆಸ್ ಪಕ್ಷವನ್ನು ಮಣಿಸಲು ಜೆಡಿಎಸ್ ಜತೆ ಮೈತ್ರಿ ಮಾಡಿಕೊಂಡ ಬಿಜೆಪಿ, ಇದೀಗ ರಾಜ್ಯಾಧ್ಯಕ್ಷರು ಹಾಗೂ ಶಾಸಕಾಂಗ ಪಕ್ಷದ ನಾಯಕರ ನೇಮಕದಲ್ಲಿ ಅಚ್ಚರಿಯ ಹೆಜ್ಜೆ ಇಡುವ ಸಾಧ್ಯತೆ ಹೆಚ್ಚಾಗಿದೆ.

ಮಹತ್ವದ ಸಂಗತಿ ಎಂದರೆ ನಳೀನ್ ಕುಮಾರ್ ಕಟೀಲ್ ಅವರ ನಂತರ ರಾಜ್ಯ ಬಿಜೆಪಿ ಹೊಣೆಯನ್ನು ಯಾರಿಗೆ ವಹಿಸಬೇಕು ಎಂದು ತಲೆ ಕೆಡಿಸಿಕೊಂಡಿದ್ದ ಬಿಜೆಪಿ ರಾಷ್ಟ್ರೀಯ ನಾಯಕರು; ಸಮೀಕ್ಷೆಗಳ ಮೊರೆ ಹೋಗಿದ್ದರು. ಆದರೆ, ಈ ಸಮೀಕ್ಷೆಗಳಿಂದ ಹೊರಬಂದ ಫಲಿತಾಂಶ ಆ ಪಕ್ಷದ ವರಿಷ್ಠರನ್ನು ಹೊಸ ಇಕ್ಕಟ್ಟಿಗೆ ದೂಡಿದೆ.

ಕರ್ನಾಟಕದಲ್ಲಿ ಜಾತಿಗಳ ಕಪಿಮುಷ್ಟಿಯಲ್ಲಿ ಸಿಲುಕಿರುವ ಪಕ್ಷವನ್ನು ಹೊರತಂದು ಕೇಡರ್ ಬೇಸ್ ಸಂಘಟನೆ ಕಟ್ಟಲು ಸಂಘವಾರದಿಂದ ಮಾರ್ಗದರ್ಶನ ಪಡೆದಿದ್ದ ಪಕ್ಷಕ್ಕೆ ಪುನಾ ಅನಿವಾರ್ಯವಾಗಿ ಜಾತಿ ವರ್ತುಲಕ್ಕೆ ಸಿಕ್ಕಿಕೊಳ್ಳುವ ಸ್ಥಿತಿ ಎದುರಾಗಿದೆ.

ಜಾತಿಗಳ ಪ್ರಭಾವದಿಂದ ಪಕ್ಷವನ್ನು ಹೊರಗೆ ತಂದು ಸಂಘಟನೆ ಕಟ್ಟುವ ವರಿಷ್ಠರ ಕನಸು ಬಹುತೇಕ ಕೈ ಕೊಟ್ಟಿದ್ದು, ಅಧ್ಯಕ್ಷ ಸ್ಥಾನಕ್ಕೆ ವೀರಶೈವ ಸಮುದಾಯಕ್ಕೆ ಸೇರಿದ ನಾಯಕರನ್ನೇ ಆಯ್ಕೆ ಮಾಡುವಂತೆ ರಾಷ್ಟ್ರೀಯ ಬಿಜೆಪಿ ನಡೆಸಿರುವ ಎರಡು ಸಮೀಕ್ಷೆಗಳು ವರದಿ ನೀಡಿವೆ.

ಸಮೀಕ್ಷೆಗಳ ನಂತರ ಮಾಜಿ ಸಚಿವ ವಿ.ಸೋಮಣ್ಣ, ಕೇಂದ್ರದ ಮಾಜಿ ಸಚಿವ ಬಸನಗೌಡ ಪಾಟೀಲ್ ಯತ್ನಾಳ್ ಅವರ ಹೆಸರುಗಳು ಮುಂಚೂಣಿಯಲ್ಲಿದ್ದು, ಇವರ ಪೈಕಿ ಸೋಮಣ್ಣ ಅವರ ಹೆಸರೇ ಫೈನಲ್ ಆಗಬಹುದು ಎನ್ನುವ ಸುಳಿವು ಸಿಕ್ಕಿದೆ.

ಒಂದು ವೇಳೆ ಸೋಮಣ್ಣ ಅವರೇ ಅಧ್ಯಕ್ಷ ಸ್ಥಾನಕ್ಕೆ ಅಂತಿಮವಾದರೆ, ಅದಕ್ಕೆ ಯತ್ನಾಳ್ ಅವರು ತಕರಾರು ತೆಗೆಯುವ ಸಾಧ್ಯತೆ ಕಡಿಮೆ. ಯತ್ನಾಳ್‌ ಅವರು ವರಿಷ್ಠರಿಗೆ ಎದುರಾಡುವ ಸಾಧ್ಯತೆ ಇಲ್ಲ.

ಉಳಿದಂತೆ ಬಿಜೆಪಿ ಶಾಸಕಾಂಗ ಪಕ್ಷದ ನಾಯಕ ಸ್ಥಾನಕ್ಕೆ ಒಕ್ಕಲಿಗರನ್ನೇ ತರಬೇಕು ಎನ್ನುವ ಅಂಶ ಸಮೀಕ್ಷೆಗಳಲ್ಲಿ ಇದೆ ಎಂಬ ಮಾಹಿತಿ ಸಿಕ್ಕಿದೆ.

ರಾಜ್ಯ ರಾಜಕಾರಣಕ್ಕೆ ಶೋಭಾ ಹಿಂದೇಟು

ಈ ಸಮೀಕ್ಷೆಗಳಿಗೂ ಮೊದಲು ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಅವರನ್ನು ರಾಜ್ಯಾಧ್ಯಕ್ಷ ಸ್ಥಾನಕ್ಕೆ ತರಲು ಪ್ರಧಾನಿ ನರೇಂದ್ರ ಮೋದಿ, ಗೃಹ ಸಚಿವ ಅಮಿತ್ ಶಾ, ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ.ನಡ್ದಾ ಅವರು ಆಸಕ್ತಿ ತೋರಿದ್ದರು. ಇದಕ್ಕೆ ಮಾಜಿ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅವರ ಬೆಂಬಲವೂ ಇತ್ತು.

ಶೋಭಾ ಅವರು ಒಕ್ಕಲಿಗ ಸಮುದಾಯಕ್ಕೆ ಸೇರಿದವರಾಗಿದ್ದಾರೆ. ಕಾಂಗ್ರೆಸ್ ಹಾಗೂ ಜೆಡಿಎಸ್ ರಾಜ್ಯಾಧ್ಯಕ್ಷರೂ ಇದೇ ಸಮುದಾಯಕ್ಕೆ ಸೇರಿದವರಾಗಿರುವುದರಿಂದ ಪಕ್ಷಕ್ಕೆ ಲಾಭದಾಯಕವಲ್ಲ ಎಂಬ ವರದಿಯ ಹಿನ್ನೆಲೆಯಲ್ಲಿ ವರಿಷ್ಠರು ಈ ನಿರ್ಧಾರವನ್ನು ತಡೆಹಿಡಿದಿದ್ದಾರೆ. ಅಲ್ಲದೆ, ರಾಜ್ಯ ರಾಜಕಾರಣಕ್ಕೆ ಮರಳಲು ಸ್ವತಃ ಶೋಭಾ ಅವರೂ ಒಲವು ತೋರಿಲ್ಲ ಎನ್ನಲಾಗಿದೆ.

ದೀಪಾವಳಿ ಹಬ್ಬ ಅಥವಾ ಪಂಚರಾಜ್ಯಗಳ ಚುನಾವಣೆ ನಂತರ ಹೊಸ ಬಿಜೆಪಿ ಅಧ್ಯಕ್ಷರ ನೇಮಕ ಆಗುವ ಸಾಧ್ಯತೆ ಇದೆ. ರಾಜ್ಯಾಧ್ಯಕ್ಷರ ನೇಮಕಾತಿಗೆ ಕರ್ನಾಟಕದ ಮುಖಂಡರಿಂದ ಒತ್ತಡಗಳಿವೆ. ಇದಕ್ಕೆ ಮಣಿಯಬಾರದೆಂದು ಪಕ್ಷದ ವರಿಷ್ಠರು ಚುನಾವಣೆ ಸಂದರ್ಭದಲ್ಲಿ ಅಭ್ಯರ್ಥಿಗಳ ಆಯ್ಕೆಗೆ ಸಮೀಕ್ಷೆ ನಡೆಸುವ ಸಂದರ್ಭದಲ್ಲೇ ಈ ಸ್ಥಾನಕ್ಕೂ ಸಮೀಕ್ಷೆ ನಡೆಸಿದೆ.

ಪಕ್ಷದ ಕಾರ್ಯಕರ್ತರು ಹಾಗೂ ಜನಾಭಿಪ್ರಾಯದಲ್ಲಿ ವೀರಶೈವ ಸಮುದಾಯಕ್ಕೆ ಅಧ್ಯಕ್ಷ ಸ್ಥಾನ ನೀಡಿದರೆ ಮುಂಬರುವ ಲೋಕಸಭೆ ಚುನಾವಣೆಯಲ್ಲಿ ಹೆಚ್ಚು ಸ್ಥಾನ ಗಳಿಸಲು ಸಾಧ್ಯ ಎಂದು ಸಮೀಕ್ಷೆಯಲ್ಲಿ ತಿಳಿಸಲಾಗಿದೆ ಎನ್ನುವ ಅಂಶ ಸಿಕೆನ್ಯೂಸ್‌ ಗೌ ಗೆ ಗೊತ್ತಾಗಿದೆ.

ಒಂದು ವೇಳೆ ಈ ಸಮುದಾಯಕ್ಕೆ ಅವಕಾಶ ಮಾಡಿಕೊಡುವುದಾದರೆ ಸಂಘಟನಾ ದೃಷ್ಟಿಯಿಂದ ವಿ. ಸೋಮಣ್ಣ ಇಲ್ಲವೇ ಸದಾ ವಿವಾದಾತ್ಮಕ ಹೇಳಿಕೆಗಳನ್ನು ನೀಡುವ ಯತ್ನಾಳ್ ಅವರಿಗೆ ಬೆಂಬಲ ವ್ಯಕ್ತವಾಗಿದೆ. ಆದರೆ; ಯತ್ನಾಳ್ ಅವರನ್ನು ನೇಮಕ ಮಾಡಲು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಒಲವು ತೋರುತ್ತಿಲ್ಲ ಎನ್ನಲಾಗಿದೆ. ರಾಜ್ಯಾಧ್ಯಕ್ಷರಾಗಿ ವಿವಾದಾತ್ಮಕ ಹೇಳಿಕೆ ನೀಡಿ ಪಕ್ಷವನ್ನೇ ಗೊಂದಲಕ್ಕೆ ಸಿಲುಕಿಸಿದರೆ ಕಷ್ಟವಾಗುತ್ತದೆ ಎನ್ನುವ ತಕರಾರು ವರಿಷ್ಠರಲ್ಲಿ ಇದೆ.

ಸೋಮಣ್ಣ ಬಗ್ಗೆ ಗೃಹ ಸಚಿವರಿಗೆ ಒಲವು ಇದ್ದಂತಿದೆ. ಪಕ್ಷದ ಸೂಚನೆಯಂತೆ ತಮ್ಮ ಕ್ಷೇತ್ರ ಗೋವಿಂದರಾಜ ನಗರವನ್ನು ತೊರೆದು ವರುಣಾದಲ್ಲಿ ಸಿದ್ದರಾಮಯ್ಯ ವಿರುದ್ಧ ಸ್ಫರ್ಧಿಸಿ ಆದೇಶ ಪಾಲನೆ ಮಾಡಿದ್ದು ಅವರಿಗೆ ವರದಾನವಾಗುತ್ತಿದೆ.

ಆರು ತಿಂಗಳಾದರೂ ವಿಧಾನಸಭೆ ವಿರೋಧ ಪಕ್ಷದ ನಾಯಕನಿಲ್ಲ. ಹಾಲಿ ರಾಜ್ಯಾಧ್ಯಕ್ಷ ನಳೀನ್ ಕುಮಾರ್ ಕಟೀಲ್ ಅವರ ಅವಧಿ ಪೂರ್ಣಗೊಂಡು 8 ತಿಂಗಳೇ ಕಳೆದಿದೆ. ಅಲ್ಲದೆ, ವಿಧಾನಸಭೆಯ ಪ್ರತಿಪಕ್ಷ ಸ್ಥಾನಕ್ಕೆ 6 ತಿಂಗಳಿನಿಂದಲೂ ನೇಮಕವಾಗಿಲ್ಲ. ಸದ್ಯಕ್ಕೆ ರಾಜ್ಯಾಧ್ಯಕ್ಷರ ಸ್ಥಾನ ಭರ್ತಿ ಮಾಡಲು ವರಿಷ್ಠರು ಕಸರತ್ತು ನಡೆಸಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಕರ್ನಾಟಕ ಸೇರಿದಂತೆ ಲೋಕಸಭೆ ಚುನಾವಣೆ ಕುರಿತು ಸಮಾಲೋಚನೆ ನಡೆಸಲು ನವೆಂಬರ್ 10ನ್ನು ಮೀಸಲಿಟ್ಟಿದ್ದಾರೆ. ಅಂದು ರಾಜ್ಯಾಧ್ಯಕ್ಷರ ಬಗ್ಗೆ ಚರ್ಚೆ ನಡೆದು ದೀಪಾವಳಿ ಹಬ್ಬದ ನಂತರ ಹೊಸ ಅಧ್ಯಕ್ಷರ ನೇಮಕಾತಿ ಆಗಲಿದೆ ಎಂದು ಪಕ್ಷದ ಉನ್ನತ ಮೂಲಗಳು ತಿಳಿಸಿವೆ.

ಶಾಸಕಾಂಗ ಪಕ್ಷಕ್ಕೆ ನಾಯಕ ಯಾರು?

ಈ ಸ್ಥಾನ ಒಕ್ಕಲಿಗರ ಪಾಲಾಗುವ ಸಾಧ್ಯತೆ ನಿಶ್ಚಳವಾಗಿದೆ. ಆರ್.‌ಆಶೋಕ್‌, ಡಾ.ಸಿ.ಎನ್.‌ಅಶ್ವತ್ಥನಾರಾಯಣ ಅವರ ಹೆಸರುಗಳು ಪರಿಶೀಲನೆಯಲ್ಲಿವೆ. ಹಾಗೆಯೇ, ಬಿಲ್ಲವ ಸಮುದಾಯದ ಹಿರಿಯ ನಾಯಕ ಸುನೀಲ್‌ ಕುಮಾರ್‌ ಅವರ ಹೆಸರು ವರಿಷ್ಠರ ಪಟ್ಟಿಯಲ್ಲಿದೆ. ವೀರಶೈವ ಲಿಂಗಾಯಿತ ನಾಯಕರೇ ಪಕ್ಷಾಧ್ಯಕ್ಷರಾದರೆ ಬಸವರಾಜ ಬೊಮ್ಮಾಯಿ ಅವರು ಪ್ರತಿಪಕ್ಷ ನಾಯಕರಾಗುವುದು ಬಹುತೇಕ ಕಷ್ಟ.