ಕಾಂಗ್ರೆಸ್ ಕಾರ್ಯಕರ್ತರ ದರ್ಪ; ಅವಾಚ್ಯ ಶಬ್ದಗಳಿಂದ ನಿಂದನೆ, ಮಾಜಿ ಮುಖ್ಯಮಂತ್ರಿ ಹೆಚ್.ಡಿ.ಕುಮಾರಸ್ವಾಮಿ ಅವರ ಬಗ್ಗೆಯೂ ಕೀಳು ಅಭಿರುಚಿಯ ಪದ ಬಳಕೆ
ಚಿಕ್ಕಬಳ್ಳಾಪುರ: ಕೊಟ್ಟ ಭರವಸೆಯನ್ನು ಈಡೇರಿಸಿ ಎಂದು ಶಾಸಕ ಪ್ರದೀಪ್‌ ಈಶ್ವರ್‌ ಅವರನ್ನು ಪ್ರಶ್ನೆ ಮಾಡಿದ ಜೆಡಿಎಸ್‌ ಕಾರ್ಯಕರ್ತರೊಬ್ಬರಿಗೆ ಕಾಂಗ್ರೆಸ್ ಮುಖಂಡರಿಬ್ಬರು ಅವಾಚ್ಯ ಶಬ್ದಗಳಿಂದ ನಿಂದಿಸಿ, ಪ್ರಾಣ ಬೆದರಿಕೆ ಹಾಕಿರುವ ಘಟನೆ ನಡೆದಿದೆ.
ಜಿಡಿಎಸ್‌ ಯುವ ಮುಖಂಡ ಅಕಿಲ್‌ ರೆಡ್ಡಿ ಬೆದರಿಕೆಗೆ, ನಿಂದನೆಗೆ ಒಳಗಾದ ಜೆಡಿಎಸ್‌ ಕಾರ್ಯಕರ್ತ. ಕಾಂಗ್ರೆಸ್ ಮುಖಂಡರು, ಶಾಸಕರ ಬೆಂಬಲಿಗ, ಶಾಸಕರ ಊರಿನವರೇ ಆದ ಜೋಳ ಕಿಟ್ಟಪ್ಪ ಅಲಿಯಾಸ್‌ ರಾಮಕೃಷ್ಣ ಹಾಗೂ ಗುಡಿಬಂಡೆ ತಾಲೂಕಿನ ಕೋರೇನಹಳ್ಳಿ ಗ್ರಾಮದ ಶಶಿಕುಮಾರ್‌ ಬೆದರಿಕೆ ಒಡ್ಡಿದವರು.
ಶುಕ್ರವಾರ ರಾತ್ರಿ 8.30 ಸಮಯಕ್ಕೆ ಅಕಿಲ್‌ ರೆಡ್ಡಿಗೆ ಮೊಬೈಲ್ ಕರೆ ಮಾಡಿರುವ ಈ ಇಬ್ಬರೂ, “ವಿಡಿಯೋ ಮಾಡಿ ಶಾಸಕರನ್ನು ಟೀಕಿಸುವುದು, ಪ್ರಶ್ನೆ ಮಾಡುವುದನ್ನು ನಿಲ್ಲಿಸದಿದ್ದರೆ ನೆಟ್ಟಗಿರಲ್ಲ” ಎಂದು ನೇರವಾಗಿಯೇ ಬೆದರಿಕೆ ಹಾಕಿದ್ದಾರೆ.
ಇವರಿಬ್ಬರೂ ಅಕಿಲ್‌ ರೆಡ್ಡಿಗೆ ಬೆದರಿಕೆ ಹಾಕಿರುವ ಆಡಿಯೋ ಟೇಪ್‌ ಸಿಕೆನ್ಯೂಸ್‌ ನೌ ಗೆ ಲಭ್ಯವಾಗಿದ್ದು, ಇಬ್ಬರೂ ತೆಲುಗು ಭಾಷೆಯಲ್ಲಿ ಅಕಿಲ್‌ ರೆಡ್ಡಿಯನ್ನು ಅವಾಚ್ಯ ಶಬ್ದಗಳಲ್ಲಿ ನಿಂದಿಸಿ ಬೆದರಿಕೆ ಹಾಕಿದ್ದಾರೆ. ಅಲ್ಲದೆ, ಮಾಜಿ ಮುಖ್ಯಮಂತ್ರಿ ಹೆಚ್.ಡಿ.ಕುಮಾರಸ್ವಾಮಿ ಅವರನ್ನು ವೈಯಕ್ತಿವಾಗಿ ನಿಂದಿಸಿ ಅವರ ಚಾರಿತ್ರ್ಯಹರಣ ಮಾಡುವ ಕೃತ್ಯ ಎಸಗಿದ್ದಾರೆ.
ಅಕಿಲ್‌ ರೆಡ್ಡಿ ಸಮಜಾಯಿಷಿ ಕೊಡಲು ಪ್ರಯತ್ನ ಮಾಡಿದರೂ, ಆ ಮುಖಂಡರು ಮಾತನಾಡಲು ಅವಕಾಶವನ್ನೇ ನೀಡದೆ ಏಕವಚನದಲ್ಲಿ, ಅವಾಚ್ಯ ಶಬ್ದಗಳಲ್ಲಿ ಮನಸೋ ಇಚ್ಛೆ ನಿಂದಿಸಿದ್ದಾರೆ. ವರದಿಯಲ್ಲಿ ಬರೆಯಲಾಗದ ಕೆಟ್ಟ, ಕೊಳಕು ಶಬ್ದಗಳನ್ನು ಅವರು ಬಳಕೆ ಮಾಡಿದ್ದು, ಮಾತಿನ ನಡುವೆ ಜಾತಿಯನ್ನೂ ಎಳೆದುತಂದು, ತಾಯಿ-ತಂದೆಯನ್ನು ನಿಂದಿಸಿದ್ದಾರೆ.
ಕರೆ ಮಾಡಿದಾಗ ಮೊದಲು ಮಾತನಾಡುವ ಜೋಳ ಕಿಟ್ಟಪ್ಪ; “ವಿಡಿಯೋಗಳನ್ನು ಮಾಡ್ತಾ ಇದ್ದೀಯಾ.. ಏನ್‌ ಕೆಲಸ ನಿನಗೆ? ನೀನು ಏನ್‌ ಕೇಳಬೇಕು? ಯಾಕ್‌ ಕೇಳಬೇಕು?” ಎಂದು ಜೋರು ಮಾಡುತ್ತಾರೆ. ಕೂಡಲೇ ಮಧ್ಯದಲ್ಲಿ ಬಾಯಿ ಹಾಕುವ ಶಶಿಕುಮಾರ್‌, ಏಕಾಎಕಿ ಅಸಭ್ಯ ಭಾಷೆಯಲ್ಲಿ ಅಕಿಲ್‌ ರೆಡ್ಡಿಯನ್ನು ಮನ ಬಂದಂತೆ ನಿಂದಿಸುತ್ತಾರೆ.
“ನೀನ್‌ ಯಾವನೋ ಶಾಸಕರ ಬಗ್ಗೆ ಮಾತನಾಡೋಕೆ? ಏನ್‌ ಅಂದುಕೊಂಡಿದ್ದೀಯಾ? ನಮ್ಮ ಕಥೆ ನಿನಗೆ ಗೊತ್ತಿಲ್ಲ… ಎಂಎಲ್‌ʼಎಯನ್ನು ಪ್ರಶ್ನೆ ಮಾಡೋಕೆ ನೀನ್‌ ಯಾವನೋ?” ಎಂದು ಧಮ್ಕಿ ಹಾಕಿದ್ದಲ್ಲದೆ, ಕುಮಾರಸ್ವಾಮಿ ಅವರ ಬಗ್ಗೆ ಅಸಭ್ಯವಾಗಿ, ವಿಕೃತವಾಗಿ ಮಾತನಾಡಿದ್ದಾರೆ ಜೋಳ ಕಿಟ್ಟಪ್ಪ.
“ನೀನು ಜೆಡಿಎಸ್‌ ನವನು. ಎಂಎಲ್‌ ಎ ಬಗ್ಗೆ ಮಾತನಾಡೀಕೆ ನೀನ್‌ ಯಾವನೋ? ನಿನಗೆ ಹಿಂದೆಯೇ ಒದೆ ಬೀಳಬೇಕಿತ್ತು” ಎಂದು ಜೋಳ ಕಿಟ್ಟಪ್ಪ ಬೆದರಿಕೆ ಒಡ್ಡುತ್ತಾರೆ.
“ಏಯ್‌ ನೀನ್‌ ವಿಡಿಯೋ ಮಾಡು.. ಅವನ ಅಮ್ಮನ್‌ ಯಾವನು ಬರ್ತಾನೋ ನೋಡ್ತೀನಿ..” ಎಂದು ಜೋರು ಮಾಡುವ ಶಶಿಕುಮಾರ್‌, ಅಕಿಲ್‌ ರಡ್ಡಿಗೆ ಮಾತನಾಡಲು ಅವಕಾಶವನ್ನೇ ನೀಡದೇ ಮನಸೋಇಚ್ಛೆ ಕೀಳುಭಾಷೆಯಲ್ಲಿ ನಿಂದಿಸಿದ್ದಾರೆ.
“ನೀನು ನಮ್ಮ ಪಕ್ಷಕ್ಕೆ ವೋಟ್‌ ಹಾಕಿಲ್ಲ, ನೀನ್‌ ನಮ್ಮ ವೋಟರ್‌ ಅಲ್ಲ. ಹಾಗಿದ್ದ ಮೇಲೆ ನಮ್ಮ ಪ್ರದೀಪ್‌ ಈಶ್ವರ್‌ ಬಗ್ಗೆ ಮಾತನಾಡೋದಕ್ಕೆ ನೀನ್‌ ಯಾವನು? ನೀನ್‌ ಜೆಡಿಎಸ್‌ ಪಾರ್ಟಿಯಲ್ಲಿ ಇರೋನು. ನೀನು ಕಾಂಗ್ರೆಸ್ ಪಕ್ಷದಲ್ಲಿ ಇದಿಯಾ ನಮ್‌ ಎಂಎಲ್‌ ಎ ಬಗ್ಗೆ ಮಾತನಾಡೋದಕ್ಕೆ.. ನಿಮ್ಮ ಅಪ್ಪನಿಗೆ ಹುಟ್ಟಿದ್ರೆ ವಿಡಿಯೋ ಮಾಡು.. ಪೇರೇಸಂದ್ರಕ್ಕೆ ಬಾ.. ನಿನಗೆ ಬಾರಿಸಬೇಕು..” ಎಂದು ಶಶಿಕುಮಾರ್‌ ಧಮ್ಕಿ ಹಾಕಿದ್ದಾರೆ.
ಶುಕ್ರವಾರ ರಾತ್ರಿ ರಾತ್ರಿ 8.30 ಸಮಯಕ್ಕೆ ನನಗೆ ಮೊಬೈಲ್ ಕರೆ ಮಾಡಿದ ಜೋಳ ಕಿಟ್ಟಪ್ಪ(ರಾಮಕೃಷ್ಣ) ಹಾಗೂ ಶಶಿಕುಮಾರ್‌ ನನ್ನನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿದರು. ನಾನು ಅವರಿಗೆ ವಿವರಣೆ ಕೊಡಲು ಯತ್ನಿಸಿದರೂ ಇಬ್ಬರೂ ನನ್ನನ್ನು ಹಾಗೂ ಮಾಜಿ ಮುಖ್ಯಮಂತ್ರಿ ಕುಮಾರಣ್ಣ ಅವರನ್ನು ಅತ್ಯಂತ ಕೆಟ್ಟದಾಗಿ ನಿಂದಿಸಿದರು.
ಅಖಿಲ್‌ ರೆಡ್ಡಿ, ಜೆಡಿಎಸ್‌ ಯುವ ಮುಖಂಡ, ಚಿಕ್ಕಬಳ್ಳಾಪುರ
ಧಮ್ಕಿ ಹಿನ್ನೆಲೆ ಕಥೆ ಏನು?
ಕೆಲ ತಿಂಗಳ ಹಿಂದೆ ಸಭೆಯಲ್ಲಿ ಭಾಷಣ ಮಾಡಿದ್ದ ಶಾಸಕ ಪ್ರದೀಪ್‌ ಈಶ್ವರ್‌, “ಅಣ್ಣಾ ನನಗೊಂದು ಆಸೆ ಇದೆ. ನೀವೆಲ್ಲಾ ಕೈ ಜೋಡಿಸಿದರೆ ಒಂದು ತಿಂಗಳೊಳಗಡೆ ಪಿಎಲ್‌ ಡಿ ಬ್ಯಾಂಕ್‌ ನಲ್ಲಿ ಕೆ.ಬಿ.ಪಿಳ್ಳಪ್ಪ ಅವರ ವಿಗ್ರಹ ಸ್ಥಾಪಿಸಬೇಕು ಅಂತ ನನ್ನಾಸೆ” ಎಂದು ಹೇಳಿದ್ದರು.
ಆರು ತಿಂಗಳಾದರೂ ಪಿಳ್ಳಪ್ಪ ಅವರ ವಿಗ್ರಹ ಸ್ಥಾಪನೆ ಆಗದ ಬಗ್ಗೆ ವಿಡಿಯೋ ಮಾಡಿ ಫೇಸ್‌ ಬುಕ್‌ ನಲ್ಲಿ ಹಾಕಿ ಪ್ರಶ್ನೆ ಮಾಡಿದ್ದ ಅಕಿಲ್‌ ರೆಡ್ಡಿ, ಪ್ರಶ್ನೆ ಮಾಡಿದ್ದಾರಲ್ಲದೆ, ಶಾಸಕರು ಮಾತು ಕಡಿಮೆ ಮಾಡಿ ಕೆಲಸ ಜಾಸ್ತಿ ಮಾಡಿ ಎಂದು ಸಲಹೆ ಮಾಡಿದ್ದರು.
ಅಕಿಲ್‌ ರೆಡ್ಡಿ ಭಾಷೆಯಲ್ಲಿ ಶಾಸಕರನ್ನು ನಿಂದಿಸುವ ಶಬ್ದವಾಗಲಿ ಅಥವಾ ಅವರನ್ನು ವೈಯಕ್ತಿಕವಾಗಿ ನಿಂದಿಸುವ ಪದಗಳಾಗಲಿ ಇಲ್ಲ. ಆ ವಿಡಿಯೋ ಕೂಡ ಸಿಕೆನ್ಯೂಸ್‌ ನೌ ಗೆ ಲಭ್ಯವಾಗಿದೆ.
ಅಕಿಲ್‌ ರೆಡ್ಡಿ ವಿಡಿಯೋವನ್ನು ಕಂಡು ರೊಚ್ಚಿಗೆದ್ದಿರುವ ಜೋಳ ಕಿಟ್ಟಪ್ಪ, ಶಶಿಕುಮಾರ್‌ ಅಸಭ್ಯ ಭಾಷೆಯಲ್ಲಿ ನಿಂದಿಸಿ ಜೀವ ಬೆದರಿಕೆಯನ್ನು ಒಡ್ಡಿದ್ದಾರೆ. ಅವರ ನಿಂದನಾ ಆಡಿಯೋ ಕುಮಾರಸ್ವಾಮಿ ಅವರ ಗಮನಕ್ಕೂ ಹೋಗಿದೆ.
